Ölkə səhiyyəsini sarsıdan acı xəbər yayılıb. Gənc həkim, kardioloq Nurlana Əliyeva qəfil vəfat edib. Hadisə yaxınları, həmkarları və onu tanıyanlar arasında dərin kədər doğurub.
Xebernur.com xəbər verir ki, mərhum həkim yaşadığı evdə boğulma nəticəsində dünyasını dəyişib. İlkin məlumatlara görə, hadisə qəfil baş verib və bütün müdaxilələrə baxmayaraq, onun həyatını xilas etmək mümkün olmayıb. Faktla bağlı müvafiq qurumlar tərəfindən araşdırma aparıldığı bildirilir.
Qeyd edək ki, Nurlana Əliyeva Dəmir Yol Xəstəxanasında kardioloq kimi fəaliyyət göstərib. O, qısa müddət ərzində peşəkarlığı, məsuliyyətli yanaşması və pasiyentlərlə humanist münasibəti ilə seçilib. Həmkarlarının sözlərinə görə, N.Əliyeva gənc yaşına baxmayaraq, işinə ciddi yanaşan, daim öz üzərində çalışan və pasiyentlərin sağlamlığını hər şeydən üstün tutan həkimlərdən biri olub.
Onu tanıyanlar bildirir ki, Nurlana Əliyeva təkcə savadlı həkim deyil, eyni zamanda yüksək insani keyfiyyətlərə malik bir şəxsiyyət idi. Pasiyentlərinə ümid verən, hər zaman kömək etməyə çalışan bu gənc həkimin vaxtsız vəfatı səhiyyə ictimaiyyəti üçün böyük itki hesab olunur.
Mərhumun ailəsinə, yaxınlarına və həmkarlarına dərin hüznlə başsağlığı veririk. Allah rəhmət eləsin.