“Dövlət İmtahan Mərkəzinin (DİM) ali və orta ixtisas təhsili müəssisələrinə qəbul üçün elektron ərizə qəbuluna sabah start verməsi, lakin bu prosesə dair rəsmi “Abituriyent 1” jurnalının əvvəlcədən çap olunmaması, ciddi nöqsandır və abituriyentlərin haqlarının pozulmasına gətirib çıxarır”.

Məlumata görə, bunu təhsil eksperti Kamran Əsədov deyib.

Onun sözlərinə görə, DİM-in bu prosesi şəffaf və əlçatan etməsi üçün əsas addımlardan biri “Abituriyent” jurnalını vaxtında çap etmək və ictimaiyyətə çatdırmaqdır.

“Bu jurnal abituriyentlər üçün yalnız bir məlumat mənbəyi deyil, həm də onların hüquqlarını bilmək, qəbul qaydalarından xəbərdar olmaq və elektron ərizə vermə prosesində yolunu itirməməsi üçün əsas bələdçidir. Jurnal çap edilmədiyi və ya gec dərc edildiyi halda, abituriyentlər ya yanlış məlumat alır, ya da ümumiyyətlə ərizə prosesinə dair biliklərdən məhrum olur”.
Ətraflı
Ad - 00:13

K.Əsədov deyib ki, DİM-in illərdir davam edən ən böyük problemlərindən biri jurnalların tamamilə lazımsız vaxtda çap edilməsi və yayılmasıdır.

“İxtisas seçimi jurnalı seçim prosesinə bir gün qalmış çap edilir, indi isə abituriyentlər və kolleclərə müraciət edənlərə yol göstərən “Abituriyent 1” jurnalı ümumiyyətlə yoxdur. Bunun nəticəsi isə aydındır: insanlar ya ərizəni düzgün doldura bilməyəcək, ya da məcburən ödəniş qarşılığında kimlərdənsə bu xidməti almalı olacaq.

Bu DİM-in ictimai vəzifəsini yerinə yetirməməsi deməkdir. Qurum abituriyentlərin qəbul prosesində iştirakını rahatlaşdırmaq əvəzinə, onları çətin vəziyyətə salır və kommersiya maraqlarını gücləndirir. Nəticədə insanlar ya ərizə verməkdən çəkinəcək, ya da pul xərcləyərək bu prosesi başqalarına həvalə edəcək. Halbuki, DİM-in əsas vəzifəsi prosesləri şəffaf, açıq və hər kəs üçün əlçatan etməkdir. Əgər elektron ərizə qəbulu başlayırsa, onu müşayiət edəcək rəsmi jurnal da vaxtında çap olunmalıdır!”.

K.Əsədovun fikrincə, indiki vəziyyət bir daha göstərir ki, DİM prosesləri sistemsiz və plansız şəkildə idarə edir.

“Təhsil sistemində mühüm qərarlar qəbul edən bir qurumun bu qədər laqeyd yanaşması, abituriyentlərin taleyini riskə atır. Əgər qəbul prosesi ilə bağlı məlumatlandırma işləri gecikirsə, bu, abituriyentlərin hüquqlarına birbaşa müdaxilədir. Təhsil müəssisələrinə qəbul ciddi bir prosesdir və DİM-in bu məsələyə səthi yanaşması qəbuledilməzdir.

DİM-in bu səhvləri düzəltməsi üçün təcili olaraq “Abituriyent 1” jurnalını çap edib ictimaiyyətə təqdim etməsi, elektron ərizə prosesini addım-addım izah edən rəsmi resursları (video, broşura və s.) təqdim etməsi və bu mövzuda geniş maarifləndirmə işləri aparması vacibdir. Əks halda, bu cür gecikmələr və məsuliyyətsizlik abituriyentlərin haqsız yerə çətinlik çəkməsinə səbəb olacaq”.