“Müəllimin dərs yükü tədrisin keyfiyyətinə bilavasitə təsir göstərən əsas amillərdəndir. Amma təəssüf ki, sosial-iqtisadi vəziyyət müəllimləri çox dərs deməyə məcbur edir”.

Modern.az-ın məlumatına görə, bunu təhsil eksperti Kamran Əsədov müəllimlər arasında daim müzakirə olunan “dərs yükü” məsələsinə münasibət bildirərkən deyib.

K.Əsədov deyib ki, 2016-cı ildə bir stavka dərs yükünün 12 saatdan 18 saata qaldırılması ciddi səhv idi. Bu qərar müəllimin fənnə, şagirdə və özünə vaxt ayırmaq imkanlarını məhdudlaşdırdı.

“Hesab edirəm ki, müəllimlərin bir stavka dərs yükü yenidən 12 saata endirilməli, əlavə olaraq isə hər bir müəllim üçün sabit vəzifə maaşı (500-600 manat arası) müəyyən edilməlidir. Dərs yükünə görə isə ayrıca ödəniş tətbiq olunmalıdır”, - təhsil eksperti deyib.

K.Əsədovun sözlərinə görə, ABŞ, Böyük Britaniya, Türkiyə və Almaniya kimi ölkələrdə müəllimlərin dərs saatları 19-30 saat aralığında tənzimlənir. Azərbaycanda isə bu rəqəm bəzi hallarda həftədə 36 saatı aşır.

“Təsəvvür edin: 36 saat dərs deyən müəllimlə, 12 saat dərs deyən müəllimin dərs keyfiyyəti eyni ola bilərmi? Əlbəttə, xeyr. Bu həm müəllimi, həm şagirdi itirən bir sistemdir.

Keyfiyyətli təhsil istəyiriksə, əvvəlcə müəllimə keyfiyyətli iş şəraiti yaratmalıyıq”.

Xatırladaq ki, 2016-cı ilədək müəllimlərin bir stavka dərs yükü 12 saat idi. Nazirlər Kabinetinin 11 iyul 2016-cı il tarixli qərarına əsasən, diaqnostik qiymətləndirməsi aparılan müəllimlərə "bir stavka dərs yükü 18 saat olmaqla, aylıq vəzifə maaşı” müəyyən edilib.