"İnanclı insanlardan çoxlu suallar alıram ki, spirtdən istifadə edə bilərikmi. Sual edirlər ki, spirtli mayelər İslamda nəcis hökmünədir, biz nə edək?

İlahiyyatçı-İslamşünas olaraq sual edən möminlərin nəzərinə çatdırım ki, sərxoşedici spirtli mayelərin, içkilərin sərxoşluq məqsədi ilə içilməsi yasaq edilib. Əgər o spirtli maye ki, içilmək üçün yox, tibbi vasitə kimi, dezinfeksiya üçün nəzərdə tutulub, onun istifadəsi caizdir. Spirtin, şərabın nəcis olmasına gəlincə isə üləmanın əksərinə görə içilən mayelər natəmiz hökmündədir. Amma şəraba pak hökmü verən müctəhid-fəqihlər də var. Fəqət, texniki spirtin pak olub, istifadə edilməsi yekdilliklə icazəlidir.

Əgər əlacsız qalaraq texniki spirt tapmasanız, həkim tövsiyyəsi ilə içilən spirtlərdən, məsələn, araqdan tibbi vasitə kimi istifadə edə bilərsiniz. Zatən, bir çox maye dərman preparatlarının da tərkibində müəyyən faiz spirt olur.

Çünki İslamda məcburiyyət qarşısında, çıxılmaz vəziyyətlər yarandıqda, ölüm təhlükəsi ilə üzləşdikdə bəzi haram hökmündə olan vasitələr in istifadəsi icazəli, hətta daha fövqəladə halda vacib olur. Məsələn, Quranda Maidə surəsi, 3 cü ayədə Allah təala buyurur ki, əgər aclıq, digər çıxılmaz və naçar vəziyyətdə qalarsınızsa günaha meyl etmək niyyəti olmadan haram edilmiş qidalardan istifadə edə bilərsiniz.

Spirtli içkilər də belədir. Əgər harama meyl etmək niyyəti yoxsa, əlacsızlıqdan tibbi vasitə, virus və mikrobdan qorunmaq üçün (texniki spirt tapılmadıqda və əlac yalnız spirtli mayeyə qaldıqda) istifadə etmək olar.

İslamda Əzimət(dəyişməz qəti hökm) və Rüxsət(zaman, məkan və şəraitə görə dəyişən) hökmlər var.
Buna Fiqh elmində hökmü - əvvəl və hökmü - sanəvi (birinci dərəcəli hökmlər və ikinci dərəcəli hökmlər deyilir. Zaman, məkan və insanın düşdüyü şəraitə görə bəzi haramlar halala, halallar da harama çevrilə bilir."

Tural İrfan
İlahiyyatçı-yazar, İslamşünas

Xəbərnur