Qazi Qasımov Vüqarın sosial şəbəkə hesabı ələ keçirilib — vətəndaş DİN-ə müraciət edib

Son günlərdə sosial şəbəkələrdə Qasımov Vüqar Qazinin adı ilə paylaşılan məlumatlar və yayılan mesajlar cəmiyyətdə müzakirələrə səbəb olub. Lakin məsələ ilə bağlı açıqlama verən Qazi bildirib ki, həmin hesablar onun nəzarətində deyil və adı onun adından istifadə edən şəxslər tərəfindən təhqir və qaralama məqsədilə işlədilir.

Qasımov Vüqarın sözlərinə görə, bir müddət əvvəl onun şəxsi sosial şəbəkə hesabı icazəsiz olaraq başqalarının nəzarətinə keçib. Həmin şəxslər hesabı idarə edərək, müxtəlif təxribat xarakterli yazılar paylaşır, insanlara mesajlar göndərir və onun nüfuzuna xələl gətirmək üçün kampaniya aparırlar.

“Uzun müddətdir şəxsi işlərimlə məşğulam və ictimaiyyətlə əlaqələrimi sosial şəbəkə üzərindən qururdum. Təəssüf ki, hesabım ələ keçirildikdən sonra mənim adımdan saxta məlumatlar paylaşılmağa başladı. Bu yolla nüfuzuma zərbə vurmaq, mənimlə bağlı yanlış təsəvvür yaratmaq cəhdləri edilir. Mən rəsmi şəkildə bildirirəm ki, həmin paylaşımların heç birinin mənimlə əlaqəsi yoxdur”, — deyə o qeyd edib.

Vətəndaş artıq məsələ ilə bağlı Daxili İşlər Nazirliyinə müraciət edib. O, hüquq-mühafizə orqanlarından qanunsuz hərəkətlərin araşdırılmasını, məsul şəxslərin müəyyən edilərək cəzalandırılmasını və saxta səhifənin bağlanmasını xahiş edib.

Eyni zamanda Qasımov Vüqar ictimaiyyəti və sosial şəbəkə istifadəçilərini diqqətli olmağa çağırıb:
“Xahiş edirəm, həmin səhifədən gələn mesajlara inanmayın, paylaşılan saxta məlumatları yaymayın. Əgər belə mesajlar almısınızsa, onları mənə göndərin və aidiyyəti orqanlara da məlumat verin. Mən rəsmi qaydada həm DİN-ə, həm də sosial şəbəkə rəhbərliyinə şikayət etmişəm. Hazırda prosesi izləyirəm və hüquqlarımın qorunacağına inanıram”.