Qazaxda Şəhid Ailəsinə Hörmətsizlik İddiası İctimaiyyət İcra Hakimiyyətini Addım Atmağa Çağırır

Qazax rayonunda Şəhid Elşən Orucovun ailəsinə qarşı göstərilən münasibət geniş narazılığa səbəb olub. Sosial şəbəkələrdə yayılan görüntülər və iddialar əsasında məsələ gündəmə gətirilib və ictimaiyyət tərəfindən Qazax Rayon İcra Hakimiyyətinə sərt çağırış edilib.

Məlumata görə, şəhidin plakatının müxtəlif şəxslər tərəfindən yerindən çıxarılması, kənara atılması və ailəyə psixoloji təzyiqlərin göstərilməsi barədə iddialar uzun müddətdir davam edir. İddiaya əsasən, Vəli Şamilov və Vasif Abdiyev tərəfindən şəhid ailəsi üzərində müxtəlif təzyiqlər və maneələr yaradıldığı bildirilir.

Şikayətçilər ən çox bu məqamı vurğulayırlar ki, İcra Hakimiyyətinin nümayəndələri şəhidin il mərasimində belə iştirak etməyiblər, lakin nədənsə məcburi köçkünlərlə birlikdə şəhidin plakatının götürülməsi prosesində yer alıblar. Bu hal sosial şəbəkələrdə ciddi qınaqla qarşılanıb və “şəhid ruhuna hörmətsizlik” kimi qiymətləndirilib.

Şəhidin həyat yoldaşının onkoloji xəstəliklə mübarizə apardığı nəzərə alınarsa, ailəyə göstərilən psixoloji yükün daha ağır olduğu vurğulanır. İctimai fəallar və qazilər bildirirlər ki, belə həssas durumda olan bir ailəyə münasibətdə daha diqqətli davranılmalı, dövlət qurumları tərəfindən xüsusi dəstək göstərilməlidir.

Məsələ ilə bağlı yayılan sərt müraciətdə qeyd olunur:

“Qazax Rayon İcra Hakimiyyəti şəhid ailəsinə sahib çıxmalı, iki nəfərin iradəsinə boyun əyməməli və baş verənlərlə bağlı ciddi tədbirlər görməlidir. Şəhid ailəsinə qarşı hər hansı hörmətsizlik bütün cəmiyyətə qarşı hörmətsizlik deməkdir.”

İctimaiyyət bildirir ki, şəhid ailələrinin müdafiəsi, onların hüquqlarının qorunması və mənəvi rifahının təmin olunması dövlət qurumlarının birbaşa vəzifəsidir və bu istiqamətdə laqeydlik qəbuledilməzdir.

Hazırda məsələ ilə bağlı rəsmi açıqlama verilməyib. Cəmiyyət, qazilər və media qurumları Qazax Rayon İcra Hakimiyyətindən operativ və ciddi reaksiya gözləyir.