Mingəçevir şəhəri Puşkin küçəsi 14/1 ünvanında yaşayan Allahverdiyev Allahverdi Əli oğlu yaşadığı məhəllədə aparılan tikinti və obyektləşdirmə işləri ilə bağlı narazılıq edir. O, bir müddətdir ki, həm şəxsi rahatlığının, həm də ümumi yaşayış mühitinin pozulduğunu bildirir.

Şikayətçinin sözlərinə görə, Fazil Allahverdiyev adlı şəxs Heydər Əliyev prospekti 56 və Puşkin küçəsi 14/1 ünvanlarında binaların qarşısındakı iki məhəlləni zəbt edərək əvvəlcə “Balıq evi”, daha sonra isə mehmanxana tikintisinə başlayıb. Sakinlər iddia edirlər ki, uşaq meydançası da avtodayanacağa çevrilib.

Allahverdi Allahverdiyev qeyd edir ki, hazırda yaşadığı binanın qarşısında yeni mehmanxana inşa olunur. Obyektin birinci mərtəbəsi artıq tikilib, ikinci mərtəbə üçün metal-beton konstruksiyalar gətirilib. Onun sözlərinə görə, tikinti başa çatdıqdan sonra yaşayış binasının eyvanları ilə yeni obyekt arasında cəmi 1–2 metrlik məsafə qalacaq.

Sakinlər bildirirlər ki, tikinti işləri nəticəsində həyətdəki kiçik istirahət sahəsi də sıradan çıxıb, ağacların suvarılması çətinləşib. İddialara görə, ağacların quruması hesabına tikinti sahəsinin genişləndirildiyi ehtimal olunur.

İcra Hakimiyyəti məsuliyyəti digər qurumlara yönləndirir

Şikayətçi Mingəçevir Şəhər İcra Hakimiyyətinin başçısı İlham İsmayılova müraciət etsə də, ona bildirilmişdir ki, məsələ İcra Hakimiyyətinin səlahiyyətində deyil. Cavabda tikintiyə nəzarətin Tikintidə Təhlükəsizliyə Nəzarət Dövlət Agentliyinə və Dövlət Şəhərsalma və Arxitektura Komitəsinə aid olduğu qeyd olunub.

Sakinlər hesab edir ki, icra hakimiyyəti yerlərdə dövlət başçısının təmsilçisi olaraq problemlərin həllində daha fəal iştirak etməlidir.

Sakinlərin tələbi: Komissiya yaradılsın

Şikayətçilər Dövlət Şəhərsalma və Arxitektura Komitəsinin sədri Anar Quliyevdən ərazidə aparılan tikinti ilə bağlı komissiya yaradılmasını, onların və medianın iştirakı ilə yerində baxış keçirilməsini tələb edirlər.

Bələdiyyə ilə əlaqə qurmaq mümkün olmayıb

Hadisə ilə bağlı Mingəçevir bələdiyyəsi ilə əlaqə saxlamaq cəhdləri də nəticə verməyib. Bələdiyyə sədri Anar İsmayılovun mobil nömrəsinin deaktiv olduğu bildirilib. Yalnız WhatsApp vasitəsilə cavab verən Anar İsmayılovun sonrakı zənglərə reaksiya vermədiyi iddia olunur.

Bununla bağlı İcra Hakimiyyətinin Humanitar şöbəsinin əməkdaşları da əlavə məlumat verməkdən imtina ediblər.

Media nümayəndəsinə təzyiqlər olduğu iddia olunur

Mövzunu işıqlandıran jurnalist bildirir ki, məsələ ictimailəşdirildikdən sonra bəzi şəxslər tərəfindən sosial şəbəkələrdə təzyiq və təhqirlər edilib. Jurnalist həmçinin bəzi şəxslərin özlərini media nümayəndəsi kimi təqdim edərək yanlış məlumatlar yaydığını qeyd edir.

İddialarla bağlı qarşı tərəflərin mövqeyini işıqlandırmağa hazırıq. Dövlət Şəhərsalma və Arxitektura Komitəsi, Tikintidə Təhlükəsizliyə Nəzarət Dövlət Agentliyi, Mingəçevir Şəhər İcra Hakimiyyəti və Mingəçevir Bələdiyyəsinin mövqeləri təqdim olunduğu halda dərc ediləcək.




Sima Babayeva