Milli Məclisin biznesmen deputatı Məşhur Məmmədovun adı növbəti qalmaqallı iddialarda hallanır. Sosial şəbəkələrdə və mediada yayılan məlumatlara görə, deputat mandat əldə etdikdən sonra informasiya imkanlarını genişləndirərək gizli şəkildə bir neçə media resursu formalaşdırıb.
“Azərbaycan Reallığı”nın yaydığı məlumata əsasən, hələlik adı açıqlanmayan həmin media platformalarının Məşhur Məmmədovun fəaliyyətinin təbliği ilə yanaşı, ayrı-ayrı məmur və deputatlara qarşı sərt və açıq tənqidlər yayımladığı iddia olunur.
Bildirilir ki, sözügedən media resurslarında bəzi ictimai və siyasi fiqurlar barəsində ardıcıl tənqidi materiallar dərc edilir və bu yazıların onların ictimai nüfuzuna mənfi təsir göstərdiyi vurğulanır. İddialara görə, hədəfə alınan şəxslər əsasən deputatla münasibətləri gərgin olan və ya onunla anlaşa bilməyən məmurlardır.
Məlumatlarda həmçinin qeyd olunur ki, həmin media platforması bəzi dövlət qurumları və müəssisə rəhbərləri ilə yaxın münasibətlər qurub. İddialara əsasən, “himayə” qarşılığında maliyyə dəstəyi mexanizmi mövcuddur və bu proses qeyri-rəsmi şəkildə həyata keçirilir.
Sosial mediada yayılan bu iddialar müəyyən dairələrdə ciddi narazılıq doğurub və məsələ ictimai müzakirələrə səbəb olub.
Qeyd edək ki, səsləndirilən iddialarla bağlı indiyədək Məşhur Məmmədov və ya adıçəkilən tərəflər tərəfindən rəsmi mövqe açıqlanmayıb. Mövzu ilə bağlı qarşı tərəfin mövqeyini öyrənmək mümkün olarsa, əlavə məlumat təqdim ediləcək.