Dövlət orqanlarında ictimai iştirakçılığın tətbiqinin genişləndirilməsi və ictimai şuraların fəaliyyətinin səmərəliliyinin artırılması mövzusunda tədbir keçirilmişdir.
Tədbirdə Laçın Rayon İcra Hakimiyyəti yanında İctimai Şuranın sədri Səyyaf Məmiyev “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı” və korrupsiyaya qarşı mübarizənin gücləndirilməsində ictimai şuraların rolu haqqında geniş məlumat vermiş, Laçın rayonunda İctimai Şura üzvlərinin ictimai müzakirlərə qoşulması, şuranın iştirak etdiyi tədbirlərin və müzakirə olunan məsələlərin əhatə dairəsinin daha da genişlənməsi, dövlət orqanları və vətəndaş cəmiyyətləri ilə müzakirələrin aparılması üçün Laçın Rayon İcra Hakimiyyəti tərəfindən onlar üçün daha yaxşı şəraitin yaradıldığını bildirmişdir.
“İctimai iştirakçılıq haqqında” Azərbaycan Respublikasının Qanunundan, ictimai birliklərlə işin qurulmasından, ictimai şuranın rayon ərazisindəki fəaliyyətindən bəhs edilmiş, İctimai Şuraların fəaliyyətində cəmiyyətlə qarşılıqlı əlaqələrin gücləndirilməsinin, sağlam dialoqun qurulmasının, qərarların qəbulunda ictimai rəyin, vətəndaş maraqlarının nəzərə alınmasının əsas məqsəd olduğu qeyd olunmuşdur.
Sonda İctimai Şura üzvlərinin fikirləri dinlənilmiş, dövlət qurumlarının ictimaiyyət qarşısında hesabatlılığının artırılması və korrupsiya risklərinin azaldılması, ictimai şuraların fəaliyyətinin daha səmərəli təşkili, onların dövlət orqanları ilə sağlam dialoq çərçivəsində işləməsi məsələləri müzkirə olunmuşdur.
İclasda dövlət orqanlarında ictimai iştirakçılığın tətbiqinin genişləndirilməsi və ictimai şuraların fəaliyyətinin səmərəliliyinin artırılması mövzusunda tədbirlərin il ərzində davam etdiriləcəyi qərara alınmışdır.
