7-ci mikrorayonda illərlə həll olunmayan problem:

Sakinlər çirkab içində yaşamağa məcburdur
Bakı şəhərinin 7-ci mikrorayonunda yerləşən Abay Kunanbayev küçəsindəki 5 mərtəbəli yaşayış binasının zirzəmisində yaranmış vəziyyət ciddi narahatlıq doğurur.

“Bina 3A” sakinlərinin sözlərinə görə, kanalizasiya borularının partlaması nəticəsində zirzəmi uzun müddətdir ki, üfunətli çirkab sularla dolub.
Sakinlər bildirir ki, problem yeni deyil artıq 2018-ci ildən bu yana davam edir. İy-qoxu səbəbindən mənzillərdə normal yaşamaq mümkün deyil. Buna baxmayaraq, məsələ ilə bağlı aidiyyəti qurumların yetərli müdaxiləsi müşahidə olunmur.

Məsələnin ən təhlükəli tərəfi isə binanın özülünün nəmişlik səbəbindən aşınmasıdır. Bu hal gələcəkdə tikilinin dayanıqlılığına ciddi risk yarada bilər. Belə bir vəziyyətdə yüzlərlə sakinin, xüsusilə də uşaqların sağlamlığı təhlükə altındadır.
Tənqid olunan əsas məqam isə illərdir davam edən problemin hələ də köklü şəkildə həll olunmamasıdır. Sakinlərin dəfələrlə müraciət etməsinə baxmayaraq, ya müvəqqəti tədbirlər görülüb, ya da ümumiyyətlə diqqətdən kənarda qalıb.

Bu isə idarəetmə və nəzarət mexanizmlərinin effektivliyini sual altına alır.
Sosial məsuliyyət daşıyan qurumların bu kimi hallara biganə yanaşması qəbulolunmazdır. Əgər məsələ vaxtında həll edilməzsə, bu, daha böyük fəsadlara həm texniki, həm də sanitar böhranlara səbəb ola bilər.

Sakinlər artıq təkcə şikayət etməklə kifayətlənməyərək, problemlərinin ictimailəşdirilməsini və real addımların atılmasını tələb edirlər. Bu isə bir daha göstərir ki, məsələ lokal problem olmaqdan çıxaraq ictimai diqqət tələb edən ciddi məsələyə çevrilib.