Bir müddətdir ictimaiyyətin diqqət mərkəzində olan şantaj və hədə-qorxu ilə tələb etmə iddiaları üzrə adı hallanan İfadə Cəfərzadə və Pərvin Abışova ilə bağlı yeni məlumatlar yayılıb.
Məlumata görə, hüquq-mühafizə orqanlarına müraciət edən şəxslər arasında Gülbadə Abdullayeva, Fatimə Mahmudova və Zaurpress.az xəbər portalının rəhbəri Günel Kərimova da yer alır. Şikayətçilər həmin şəxslər tərəfindən müxtəlif vaxtlarda təzyiqə məruz qaldıqlarını, şantaj edildiklərini və onlardan müəyyən məbləğlər tələb olunduğunu iddia edirlər.

Şikayətçi qismində çıxış edən Gülbadə Abdullayeva bildirib ki, şəxsi həyatına aid məlumatların və fotoların yayılması hədəsi ilə təzyiqlərlə üzləşib. Onun sözlərinə görə, baş verənlər nəticəsində ciddi psixoloji gərginlik yaşayıb və buna görə hüquq-mühafizə orqanlarına müraciət etmək qərarına gəlib.
İddialara əsasən, daxil olmuş müraciətlər əsasında araşdırmalara başlanılıb, İfadə Cəfərzadə və Pərvin Abışovanın ifadələri alınıb və onlar barəsində istintaq müddəti üçün polis nəzarəti altına vermə qətimkan tədbiri seçilib.
Son günlər sosial şəbəkələrdə və bəzi media resurslarında tərəflərin guya 130 min manat məbləğində razılığa gəldiyi və işin bağlandığı barədə məlumatlar yayılıb. Lakin Gülbadə Abdullayeva bu məlumatları təkzib edərək bildirib ki, heç vaxt maddi təzminat tələb etməyib.

“Şəxsi həyatımla bağlı yaşadıqlarıma görə məqsədim pul almaq olmayıb. Mən yalnız qanunun aliliyinin təmin olunmasını və hüquqi qiymətin verilməsini istəmişəm”, – deyə o bildirib.
Gülbadə Abdullayeva həmçinin iddia edir ki, istintaq dövründə ona və ailəsinə qarşı müxtəlif təhdidlər səsləndirilib, hətta şikayətini geri götürməsi üçün müəyyən təzyiq cəhdləri olub. O, bu halların araşdırmanın gedişinə təsir göstərmək məqsədi daşıya biləcəyini bildirib.
Şikayətçi təhlükəsizliyi ilə bağlı narahatlığını ifadə edərək, Azərbaycan Prezidenti İlham Əliyevə, Birinci vitse-prezident Mehriban Əliyevaya, Baş prokuror Kamran Əliyevə və daxili işlər naziri Vilayət Eyvazova müraciət edib. O, istintaq müddətində seçilmiş qətimkan tədbirinə yenidən baxılmasını xahiş edib.
Qeyd edək ki, yazıda yer alan ittiham və iddialar şikayətçi tərəfin açıqlamalarına əsaslanır. İttiham olunan şəxslərin mövqeyi təqdim edilməyib. Hazırda məsələ ilə bağlı araşdırma və istintaq tədbirləri davam edir.