İctimai işlər növündə cəzanın çəkilməsi və icrası şərtlərinə dəyişiklik təklif edilir.

XƏBƏRNUR -un xəbərinə görə, dəyişiklik təklifi sabah Milli Məclisdə 1-ci oxunuşda müzakirəyə çıxarılacaq “Azərbaycan Respublikasının Cəzaların İcrası Məcəlləsində dəyişiklik edilməsi haqqında” qanun layihəsində əksini tapıb.

Layihə bildirilir ki, məhkumlar ictimai işləri yerinə yetirdikləri yerin müəssisədaxili intizam qaydalarına riayət etməli, əməyə vicdanla yanaşmalı, onlar üçün müəyyən olunmuş yerlərdə və hökmdə müəyyən olunmuş müddətdə işləməli, müvafiq icra hakimiyyəti orqanının müəyyən etdiyi qaydada elektron nəzarət vasitəsindən istifadə etməli, elektron nəzarət vasitəsini ictimai işlərin yerinə yetirildiyi yerlərdə gəzdirməli, həmin vasitənin işlək vəziyyətdə saxlanması üçün ona xidmət etməli və yaşayış yerini dəyişdikdə bu barədə icra məmuruna məlumat verməlidir.

Hazırda qüvvədə olan qanuna görə isə məhkumlar ictimai işləri yerinə yetirdikləri yerin müəssisədaxili intizam qaydalarına riayət etməli, əməyə vicdanla yanaşmalı, onlar üçün müəyyən olunmuş yerlərdə və hökmdə müəyyən olunmuş müddətdə işləməli və yaşayış yerini dəyişdikdə bu barədə icra məmuruna məlumat verməlidirlər.

Eyni zamanda, layihəyə əsasən, ictimai işlər növündə cəzanın çəkilməsindən qərəzli boyun qaçırma hallarına yeni maddə də əlavə edilir. Bu elektron nəzarət vasitəsini gəzdirməkdən imtina edənlər, onu zədələyənlər və ya digər üsulla yararsız vəziyyətə salanlar, yaxud həmin vasitənin işlək vəziyyətdə saxlanılması üçün üzrsüz səbəbdən ona xidmət etməyənlər də ictimai işlər növündə cəzanın çəkilməsindən qərəzli boyun qaçıran şəxslər hesab olunacaq.