Havaların soyuması və qış mövsümünün yaxınlaşması ilə əlaqədar əhalinin təbii qaza olan tələbatının artması fonunda qaz cihazlarından istifadə zamanı təhlükəsizlik qaydalarının pozulması dəm qazı təhlükəsini artırır.



xebernur.com xəbər verir ki, bununla bağlı Fövqəladə Hallar Nazirliyi (FHN) əhaliyə müraciət edib.



"Fövqəladə Hallar Nazirliyi tərəfindən dəm qazının yaratdığı təhlükənin qarşısını almaq məqsədilə aparılan kütləvi maarifləndirmə işlərinə baxmayaraq, təəssüflə qeyd olunmalıdır ki, hələ də bu təhlükənin törətdiyi faciəli hallarla bağlı məlumatlar daxil olur.



Yuxarıdakıları nəzərə alaraq, Fövqəladə Hallar Nazirliyi dəm qazı təhlükəsi ilə üzləşməmək üçün aşağıda göstərilən təhlükəsizlik qaydalarına əməl olunmasının zəruriliyini bir daha xatırladır:



• qaz cihazı saz və standartlara uyğun olmalı;



• cihaz olan məkanın hündürlüyü 2 metr 20 santimetrdən az olmamalı;



• havaçəkən sistem işləməli, nəfəslik açıq olmalı;



• hamam otağında ventilyasiya borusu, qapının aşağısında dəliklər olmalı;



• tüstü bacaları ildə iki dəfə təmizlənməlidir.



Yadda saxlayın! Dəm qazı iysizdir, hiss edilmir!



Dəm qazından zəhərlənmənin əlamətləri: baş ağrısı, baş gicəllənməsi, ürək bulanması, halsızlıq.



Dəm qazından zəhərlənmə baş verdikdə dərhal zərərçəkmişi təmiz havaya çıxarıb, nəfəsalmasını çətinləşdirən geyimlərdən azad etmək, təcili tibbi yardım çağırmaq lazımdır!



Unutmayın: Qaydalara biganəlik – həyatımıza təhlükədir!



Təhlükə zamanı 112-yə zəng edin!"