"Əziz qadınlar!

Beynəlxalq Qadınlar günü münasibətilə hər birinizi təbrik edir və xoşbəxtlik arzulayıram. Sizlərə zəriflik, gözəllik və təravətli olmağı arzu edirəm. Gül-çiçəklər təbiətin, siz də bəşəriyyətin bəzəyisiniz".

Cebhe.info xəbər verir ki, bunu deputat Razi Nurullayev xanımlara ünvanladığı təbrikdə deyib.

"Qadınlar daha gözəl, daha firavan həyata layiqdirlər. Arzu edirəm ki, övladlarınız və həyat yoldaşlarınız çətinliklərini, stress və gərginliklərini evlərinə daşımasınlar. Qoy həyatınızda sülh, əmin-amanlıq olsun!

Xeyli qadınlarımız var ki, onlar bayram haqqında düşünə bilmir və bəlkə də hədiyyə ala bilməyəcəklər. Cəmiyyəti ayaqda saxlayan, Titan və Atlas kimi yer kürəsini çiyinlərində tutan bu qadınlar qəhrəmandır. Arzulayıram ki, onlar hədiyyə ala bilmədikləri illərin də hədiyyəsini alsınlar. Qoy əziz qadınlarımızın barmaqlarında və qulaqlarında ürəklərindən keçən zinət, əyinlərində xəyallarındakı paltarlar, üzlərində xobəxtlik və baxtəvərlik sevinci olsun!

Əziz qadınlar! Sizə hər zaman baş tacı olmağı arzulayıram. Çətinlikləriniz dünəndə qalsın, xoş, ümidli və xoşbəxt bir gələcəyi olan sabaha oyanasınız.

Bayramınız mübarək!",- deyə təbrikdə bildirilir.

Xəbərnur