Azərbaycanın ərazi bütövlüyünü tanıyan Bəyanat
6 oktyabr tarixində Praqada Prezident İlham Əliyevin Avropa İttifaqı Şurasının Prezidenti, Fransa Prezidenti və Ermənistanın baş naziri ilə görüşü xüsusi əhəmiyyət daşıyırdı. Təbii ki, bu görüş mühüm sənədlərin imzalanması ilə tarixə düşdü. Praqa görüşü eyni zamanda diplomatik müstəvidə Azərbaycan dövlətinin növbəti parlaq qələbəsi ilə nəticələndi. Ermənipərəst mövqesindən əl çəkməyən Fransanın və sözü ilə əməli üst-üstə düşməyən Ermənistanın manipulyasiyaları Azərbaycanı haqlı mövqeyindən döndərə bilmədi. Qətiyyət və prinsipiallıq 5 saatdan artıq çəkən görüşdə Azərbaycana qarşı hər hansı bir formada təzyiq cəhdinin baş tutmasına imkan vermədi. Görüşün yekununda qəbul edilmiş Bəyanat isə ölkəmiz üçün mühüm əhəmiyyət kəsb edirdi. Belə ki, qəbul edilmiş Bəyanata görə Azərbaycanla Ermənistan bir-birilərinin ərazi bütövlüyünü və suverenliyini tanıdı və bu xüsusda BMT Nizamnaməsi əsas sənəd kimi götürüldü. Bu isə o deməkdir ki, faktiki olaraq Ermənistan Qarabağ üzərində Azərbaycanın hakimiyyətini tanıdı. Yəni Qarabağ Azərbaycanın ayrılmaz tərkib hissəsi kimi təsdiqləndi.
Etiraf etməliyik ki, ötən dövrlərin təcrübəsi Ermənistanı könüllü olaraq bu imkanı anlayıb sülh üçün iradə nümayiş etdirəcəyinə ciddi şübhələr yaranırdı. Bu mənada cənab Prezidentin doğru zamanı və məkanı seçməklə “nəyi, nə zaman etməyi” bildiyini bir daha nümayiş etdirdi. Azərbaycan öz iradəsi və ölkə başçımızın strateji addımları ilə Ermənistanı sülhə məcbur etmə strategiyasını uğurla həyata keçirməkdədir. Kənardan ölkəmizə hər hansı bir təsir sülh gündəliyini əngəlləyə bilməz və Azərbaycan dövləti bunu dəfələrlə nümayiş etdirmişdir. Ermənistanın sülh sazişini imzalamaqdan yayınmaq cəhdləri hazırda heç bir nəticə verməməkdədir. Azərbaycan hazırda kifayət qədər siyasi, diplomatik mövqelərə malik dövlətdir. Hər zaman müvafiq danışıqlar masası arxasında bu güclü mövqeyini sübuta yetirir.
Azərbaycanın formalaşdırdığı yeni reallıqlar Ermənistanı sülh müqaviləsinə imza atmaqdan savayı başqa seçim yeri qoymur. Praqada əldə olunan ilkin razılaşmalar eyni zamanda Ermənistanda mövcud olan revanşist qüvvələrə və diaspor təşkilatlarına verilmiş güclü mesajdır. 10 noyabr Bəyanatında üzərinə götürdüyü öhdəliklərin icrasından yayınmaqla imzalanmış Bəyanatın qarantı olan Rusiyaya qarşı etdiyi hörmətsizliyin ardından rəsmi İrəvanın Avropa İttifaqına da eyni münasibəti göstərmək kimi şansı yoxdur. Qeyd etməliyik ki, hazırki proses Azərbaycanın milli maraqlarına uyğun cərəyan etməkdədir. Praqa görüşü Azərbaycan diplomatiyasının, şəxsən İlham Əliyev cənablarının qələbəsi hesab edilir. Çexiyada Azərbaycanın maraqları dövlət başçısımız İlham Əliyev cənablarının timsalında layiqincə qorunmuş oldu. İnanırıq Praqada qəbul edilmiş Bəyanat Azərbaycanla Ermənistan arasında sülhün əldə edilməsi yolunda həlledici addım olacaqdır.
Aqşin Ağayev – Siyəzən Rayon İcra Hakimiyyəti başçısının müavini.
