“Son beş ildə Azərbaycanda məşğulluq orqanları vasitəsilə və sahibkarların köməkliyi ilə 282 min nəfər işə düzəldilib”.



Xebernur.com xəbər verir ki, bunu əmək və əhalinin sosial müdafiəsi naziri Sahil Babayev İqtisadiyyat Nazirliyinin, nazirlik yanında Kiçik və Orta Biznesin İnkişafı Agentliyinin (KOBİA), Sahibkarlar (İşəgötürənlər) Təşkilatları Milli Konfederasiyasının (ASK) təşkilatçılığı ilə “Heydər Əliyev və Azərbaycanda sahibkarlığın inkişafı” mövzusunda keçirilən konfransda deyib.



Nazir, həmçinin, 14 min nəfərin peşə hazırlığına cəlb olunduğunu bildirib:



“2 000 nəfərə yaxın işsiz işlə təmin edilib. Bütün aktiv məşğulluq tədbirləri sahibkarların ciddi dəstəyi olmadan həyata keçirilə bilməzdi. Qeyd edim ki, Azərbaycanda özünüməşğulluq proqramının icrasına 2017-ci ilin sonlarından başlanılıb. Keçən il bu proqram 16 min şəxsi əhatə edib. O, xüsusilə də mikro və kiçik sahibkarlığın inkişafı baxımından önəmlidir. Ötən dövr ərzində proqram çərçivəsində 60 mindən çox ailəyə mikro və kiçik biznesin qurulması üçün dəstək göstərilib”.



“Azərbaycanda sahibkarların ciddi korporativ sosial məsuliyyət (KSM) layihələri də həyata keçirilir. Xüsusilə pandemiya dövründə qısa müddət ərzində beş milyon insanı əhatə edən sosial dəstək paketləri həyata keçirildi. Hökumət də sahibkarlarımıza bu barədə müraciət ünvanladı. Azərbaycanda pandemiya dövründə əmək müqavilələrinin sayı nəinki azalmadı, hətta artdı. Altı aylıq bir dövrdə sahibkarlar yüzminlərlə dəstək paketlərini işsizlərə təqdim etdi. Vətən müharibəsindən sonra da sahibkarlar KSM istiqamətində önəmli addımlar atdılar”, - deyə S.Babayev əlavə edib.