Bakı Şəhər Mədəniyyət Baş İdarəsi Suraxanı rayon Heydər Əliyev Mərkəzinin və Suraxanı rayon Gənclər və İdman İdarəsinin birgə təşkilatçılığı ilə Xocalı soyqırımının 28-ci ildönümünə həsr olunmuş tədbir keçirilib.
İdarədən AZƏRTAC-a bildirilib ki, tədbirdə Suraxanı rayon Gənclər və İdman İdarəsinin rəisi Amil Bağırov Xocalı soyqırımının tarixindən, Münxen Təhlükəsizlik Konfransında Azərbaycan Prezidenti İlham Əliyevin qətiyyətli çıxışdan bəhs edib və erməni vəhşiliyinin dünyaya çatdırılması ilə bağlı gənclərə öz tövsiyələrini verib.

Xocalı faciəsində hər iki valideynini itirmiş uşaqlardan, bütün ailə üzvləri vəhşicəsinə qətlə yetirilmiş ailələrdən, əsir götürülmüş həmvətənlərimizə qarşı törədilmiş insanlığa sığmayan cinayətlərdən isə Suraxanı rayon Heydər Əliyev Mərkəzinin baş elmi işçisi Vüsalə Qasımova danışıb.
Daha sonra Suraxanı rayon Gənclər və İdman İdarəsinin aparıcı məsləhətçisi Zülfiyyə Mustafayeva Heydər Əliyev Fondu, Prezident yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Xocalıya ədalət!” beynəlxalq kampaniyası çərçivəsində “İrəli” İctimai Birliyi tərəfindən çəkilən “Böyüməyən uşaqlar” filminin təqdimatını edib və iştirakçı gənclərə “İrəli” İB tərəfindən sosial şəbəkələrdə başladılmış kampaniya barədə məlumat verərək, onları bu kampaniyalarda fəal olmağa çağırıb.
Tədbirin sonunda hərbi-vətənpərvərlik musiqiləri səsləndirilib və rəsm müsabiqəsi iştirakçıları təltif olunublar.

Xəbərnur