“Nikosayağı” kimi tanınan bloger Nicat Şakirlinin cinayət işi üzrə məhkəməsi davam etdirilib.

"Report" xəbər verir ki, Bakı Ağır Cinayətlər Məhkəməsinin hakimi Samir Əliyevin sədrliyi ilə keçirilən prosesdə şahid Rais Qocayev dindirilib.

O, bildirib ki hadisə günü hava limanı istiqamətində hərəkətdə olarkən qəzanın baş verdiyini görüb.

"70-80 aralığında sürətlə gedirdim. Və arxa güzgüdən qəzanın baş verdiyini gördüm. Mən də ötmə əməliyyatı edib digər yola keçdim".

Məhkəməyə gələ bilməyən şahid Ramiz Ayvazovun ifadəsi elan edilib. Onun ifadəsində göstərilib ki, Gürcüstan vətəndaşıdır və 2012-ci ildən TIR yükdaşıma fəaliyyəti ilə məşğuldur.

"Yüküm olduğundan Bakıya TIR parkında yük maşınını parklamağa gedirdim. Yük avtomobili ilə şəhərinin tunel hissəsindən keçərkən arxadan toqquşma səsinin eşitdim. Düşündüm ki, yük maşınının qoşqu hissəsi hissəsi tunelin kənarına toqquşub. Lakin sonradan qəzanın baş verdiyini gördüm və hadisədən şok yaşadım. Sonradan öyrəndim ki mənim maşınıma çırpılan avtomobildə sərnişin ölüb".

Daha sonra zərərçəkmiş şəxsin - hadisə zamanı vəfat edən Ruslan Məmmədovun atası Şahin Məmmədovun ifadəsi elan edilib. Ş.Məmmədov bildirib ki, mərhum onun böyük oğlu idi:

"Ruslan ailəli idi və Bakıya gəlib getsə də ancaq Gəncədə ailəsi ilə yaşayır. Hadisənin baş verməsini qohumum deyib. O baş vermiş hadisə ilə bağlı şikayətçi olmadığını deyib".

Məhkəmə sənədlərin tədqiqini elan edib.
Tədqiq başa çatdıqdan sonra çıxış üçün söz prokuror Orxan Mehdiyevə verilib.

O məhkəmədən təqsirləndirilən şəxsin 6 il müddətinə azadlıqdan məhrum edilməsini istəyib.

Qeyd edək ki, hadisə ötən ilin avqustunda qeydə alınıb.

N.Şakirli idarə etdiyi “Porsche” markalı avtomobillə yük maşınına (TIR) çırpılıb. Qəza nəticəsində avtomobildə olan blogerin dostu Ruslan Məmmədov vəfat edib. Nicat Şakirlinin sağ qolu dirsəkdən amputasiya edilib.