Qazinin qardaşının ölümündə səhlənkarlıq iddiası: Ailə yenidən araşdırma tələb edir.

Qazi Aslanov Elvin Aslan oğlu qardaşı Aslanov Elgin Aslan oğlunun ölümünün obyektiv araşdırılması tələbi ilə media vasitəsilə ictimaiyyətə müraciət edib.
Onun sözlərinə görə, Elgin Aslanov 13 mart 2026-cı il tarixində səhhəti ilə əlaqədar Güvən Klinikasına müraciət edib. Ailə bildirir ki, o, 13 aprel 2026-cı il tarixində analizlər verib, 14 aprel tarixində isə ona tibbi müdaxilə zamanı iynə vurulduqdan sonra vəziyyəti qəfil ağırlaşıb. İddialara əsasən, xəstə şok vəziyyətinə düşüb və ona vaxtında lazımi tibbi yardım göstərilməyib. Nəticədə Elgin Aslanov həmin gün vəfat edib.
Ailə qeyd edir ki, mərhumun müalicəsini klinikada uroloq həkim Ceyhun Cəlilov aparıb. Hadisə ilə bağlı müxtəlif dövlət qurumlarına və hüquq-mühafizə orqanlarına dəfələrlə müraciətlər ünvanlansa da, müraciətlərin obyektiv araşdırılmadığı qənaətindədirlər.

Müraciətdə həmçinin bildirilir ki, meyit morqa təhvil verilərkən Turxan adlı həkim prosesdə iştirak edib. Ailə ekspertiza rəyləri ilə bağlı da suallarının olduğunu vurğulayaraq, ölüm hadisəsinin və ekspertiza nəticələrinin müstəqil və qərəzsiz şəkildə yenidən araşdırılmasını tələb edir.
Aslanov Elvin Aslan oğlu hesab edir ki, baş vermiş hadisənin bütün təfərrüatları araşdırılmalı, ölümün dəqiq səbəbi müəyyən edilməli və məsul şəxslərin hərəkətlərinə hüquqi qiymət verilməlidir.
Ailə Binəqədi Rayon Prokurorluğuna və digər aidiyyəti qurumlara dəfələrlə müraciət etdiklərini, lakin nəticələrdən narazı qaldıqlarını bildirərək, məsələnin ictimailəşdirilməsinə və obyektiv araşdırılmasına dəstək göstərilməsini xahiş edir.

Yazıda yer alan məlumatlar mərhumun ailəsinin iddialarına əsaslanır. Qarşı tərəfin mövqeyini dərc etməyə hazırıq.