İyunun 15-də ABŞ Dövlət katibinin köməkçisi Filip Rikerin vasitəçiliyi ilə Ermənistan hökuməti Ağdam rayonundakı minalanmış ərazilərin xəritəsini təqdim edib və bu zaman Azərbaycan tərəfi bunun əvəzinə ötən ilin noyabrın 10-da keçən gecə imzalanan üçtərəfli Bəyanatdan sonra Ermənistan tərəfindən Azərbaycan ərazisinə göndərilən və sərhədlərimizi pozduğuna görə həbs edilən 15 nəfəri təhvil verib. ABŞ-ın vasitəçiliyi ilə alınan həmin xəritədə 97 mindən artıq piyada və tank əleyhinə minaların basdırıldığı yerlərin koordinatları göstərilib.

Daha sonra iyulun 3-də Rusiya Federasiyasının təşəbbüsü ilə Ermənistan işğal dövründə Füzuli və Zəngilan rayonlarında basdırdığı təqribən 92 min tank və piyada əleyhinə minalara dair xəritələri Azərbaycan tərəfinə təqdim edib. Bu dəfə də Azərbaycan tərəfi həmin xəritənin əvəzinə sərhədlərimizi pozduğuna görə həbs etdiyi 15 nəfəri Ermənistana təhvil verib.


Bəs Ermənistanın təhvil verdiyi mina xəritələrinin etibarlılığı necə yoxlanılır?


Hərbi ekspert Üzeyir Cəfərov bildirib ki, Ermənistana heç vaxt inanmaq olmaz:

“Ermənistan adı heç vaxt həqiqətlə yan-yana olmayıb. Onların verdiyi xəritələr düşünmürəm ki, həqiqəti əks etdirsin. Onlar sadəcə vəziyyətdən çıxmaq, daxili vəziyyəti sabitləşdirmək üçün bu addımı atıblar.

Paşinyana Ermənistan daxilində müəyyən işlər görmək lazımdır ki, özündən narazı kütləni bir qədər sakitləşdirsin. Bakıda onlarla diversantın məhkəməsi gedir. Biz bu xəritə məsələsini deyəndə nəzərə almalıyıq ki, bunu ermənilər verir. Ölkənin sərhəddini Rusiya qoruyursa, ərazisində 102-ci baza varsa, onlar istədiklərini edə biləcəyini düşünürlər”.

Ekspert bildirib ki, əslində o xəritələr sonradan işimizə yaraya bilər:

“Qarabağ savaşında iştirak etmiş şəxs kimi deyə bilərəm ki, ermənilər heç bir zaman beynəlxalq hüquqa əməl etməyib. Həm hərbi əsirlərin, həm müharibədə həlak olanların dəyişdirilməsində bunu müşahidə etmişik. Aydın məsələdir ki, onların arxasında duranlar var. Mənim mövqeyim belədir ki, xəritələrə çox da köklənməli deyilik. Sonradan Ermənistana qarşı qaldıracağımız beynəlxalq davada mina xəritələrindən sübut kimi istifadə edə bilərik. Möhürü üstündə olan xəritə Ermənistan Respublikasının ərazimizdə işğalçılıq siyasəti ilə məşğul olmasının sübutu kimi kifayət edir. Bundan sonra nə qədər xəritənin verilməsi hələ məlum deyil. Sadəcə, xəritələr müəyyən işlərin daha da sürətlənməsinə xidmət göstərə bilər”.
Aysel Məhərrəm