Fevralın 23-ü dünya zəlzələ ilə oyandı. Rusiya, Tacikistan və Türkiyədə yenidən yeraltı təkanlar baş verdi. Lakin günün ən vacib xəbəri Azərbaycanın tələbi əsasında separatçıların "dövlət naziri" Ruben Vardanyanın dırnaqarası vəzifəsindən uzaqlaşdırılması oldu. Eyni zamanda digər hadisələrə də şahidlik etdik.



Dünənin icmalını təqdim edir.



Parlament Jurnalistləri Birliyi (PJB) 2022-ci ilin ən fəal deputatlarını açıqlayıb. PJB-nin sədr müavini Aqil Aslan bildirib ki, bu, sayca 16-cı sorğudur. Ən fəal deputatların kim olduğunu öyrənmək üçün bu linkə keçid edə bilərsiniz.



Separatçıların "dövlət naziri" Ruben Vardanyan Azərbaycanın tələbləri əsasında "vəzifəsindən" azad edildi. Onun yerinə Paşinyana yaxınlığı ilə seçilən Qurgen Nersisyan gətirildi. Separatçılar arasında "Sorosun adamı" kimi tanınan Nersisyanın "təyinatdan" əvvəl Paşinyana baş çəkərək onun razılığını aldığı bildirilir.



Milli Məclisin Xocalıdan olan deputatı Elman Məmmədov bildirib ki, Vardanyanın Qarabağdan getməsi Prezident İlham Əliyevin şərtinin yerinə yetirilməsi kimi qiymətləndirilməlidir: "Hesab edirəm ki, Vardanyanın arxasınca ərazimizdə kök salmış nə qədər separatçı varsa, hamısı gedəcək".



Təxribatçı milyarderin "postundan" uzaqlaşdırılmasından bir neçə saat sonra Ermənistan Baş naziri Nikol Paşinyan Rusiya Prezidenti Vladimir Putinlə telefon danışığı aparıb. Telefon danışığı zamanı Laçın yolundakı vəziyyət, üçtərəfli razılaşmalar, Ermənistan-Azərbaycan münasibətləri müzakirə olunub. Daha sonra Paşinyanın martın 2-3-də Almaniyaya səfər edəcəyi, kansler Olaf Şoltsla görüşəcəyi açıqlanıb. Axşam saatlarında isə Paşinyan BMT baş katibi Antonio Quterreşlə Laçın yolunu müzakirə edib.



Günün ən vacib açıqlamalarından biri ABŞ Dövlət Departamentindən gəldi. Departamentin sözçüsü Ned Prays Brüsseldə Avropa İttifaqı Şurası prezidenti Şarl Mişelin ev sahibliyi ilə Azərbaycan və Ermənistan liderlərinin mümkün görüşü barədə mesaj verdi. Mövzu ilə bağlı Modern.az-a danışan Bakı Politoloqlar Klubunun sədri Zaur Məmmədov vurğulayıb ki, tez bir zamanda görüşlərin keçirilməsi lazımdır: "Əldə edilmiş razılıqlardan sonra bu kimi görüşlər tərəfləri bir-birinə daha da yaxınlaşdıra bilər. Həm Azərbaycana, həm də Ermənistana müxtəlif təzyiq vasitələrindən istifadə edilir. Tərəflərin Qarabağla, Zəngəzurla, sərhədlərlə bağlı yanaşmasının yaxınlaşdırılması üçün addımlar atılacaq".



Günün digər xəbəri müəllimləri sevindirdi.



Prezident İlham Əliyevin sərəncamı ilk diaqnostik qiymətləndirilməsi aparılmış müəllimlərin, həmin müəssisələrin direktor və direktor müavinlərinin, habelə gənclərin çağırışaqədərki hazırlıq rəhbərlərinin aylıq vəzifə maaşları 2023-cü il fevralın 1-dən orta hesabla 10 faiz artırılıb. Digər bir sərəncamla analoji artım peşə məktəblərində çalışan müəllimlərə də şamil edilib.



Bəs, avtomobil bazarında vəziyyət necədir?



Ötən gün saytımızda avtomobil bazarındakı son durumla bağlı məqalə dərc olunub. Mövzu ilə bağlı Modern.az-a danışan nəqliyyat sahəsi üzrə ekspert Eldəniz Cəfərov son vaxtlar vətəndaşların daha çox elektromobillərə maraq göstərdiyini deyib. “Ötən il olduğu kimi, bu il də vətəndaşlar yeni avtomobillərdən krossoverlərə üstünlük verirlər”,- deyə o bildirib.



İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidmətinin Haqsız rəqabət və reklam qanunvericiliyinə nəzarət şöbəsinin baş məsləhətçisi Cavid Süleymanlı isə Türkiyənin "Trendyol" platformasının Azərbaycan bazarındakı rəqabətə təsir edəcəyindən narahatlığını ifadə edib. O deyib ki, “Trendyol”un Azərbaycana, xüsusilə Türkiyə istehsalı olan məhsulların satışı ilə bağlı haqsız rəqabət ehtimalları, rəqabət narahatlıqları yarana bilər.



Bundan əlavə, iqtisadçı ekspert Natiq Cəfərli saytımıza açıqlamasından Azərbaycanda kredit faizlərinin artacağını, inflyasiyanın yüksələcəyini bildirib.



Dünən Əfv Komissiyasının iclası keçirilib. İclasda əfvlə bağlı 200-ə yaxın müraciətə baxılıb. İctimai fəal Bəxtiyar Hacıyevin həbs qətimkan tədbirinin müddəti isə 2 ay uzadılıb.



Ukraynada müharibənin başlanmasının birinci ildönümünə bir gün qalmış "Reuters" agentliyində dərc olunan məqalədə qeyd olunub ki, ABŞ Ukrayna rəhbərliyinə Kiyevi dəstəkləmək üçün resursların əbədi olmadığı barədə xəbərdarlıq edib. “Hamı başa düşür ki, bu müharibə nə vaxtsa bitməlidir. Biz hamımız istərdik ki, bu, gec deyil, tez bitsin”, - adı açıqlanmayan ABŞ rəsmisi bildirib.



Ukrayna lideri Volodimir Zelenski 9 il əvvəl Rusiya tərəfindən ilhaq edilən Krımı qaytarmadan sülhün mümkün olmadığını bildirib. O, həmçinin son dövrlərdə Rusiyaya yardım etdiyi iddia edilən Çinə danışıqlar üçün təklif göndərildiyini açıqlayıb. Ukraynanın müdafiə naziri Oleksiy Reznikov bildirib ki, Rusiya Ukraynada 1 ilə verdiyi itkini Əfqanıstanda 10 ilə verməyib.



Böyük Britaniya, Almaniya, İtaliya, Kanada, Fransa, Yaponiya və ABŞ-ın daxil olduğu G7 ölkələri isə Ukraynaya 39 milyard dollar maliyyə yardımı göndərmək niyyətində olduqlarını açıqlayıb.



Ukraynanın ən güclü dəstəkçilərindən olan Britaniyanın keçmiş baş naziri Boris Conson NATO baş katibi olmaq istədiyini elan edib. Avropa İttifaqı isə Rusiyaya qarşı onuncu sanksiyalar paketi barədə yenə razılığa gələ bilməyib. Növbəti müzakirələr bu gün keçiriləcək.



BMT Baş Assambleyası Rusiya-Ukrayna müharibəsi ilə bağlı qətnamə qəbul edib. Səsvermədə iştirak edən 193 ölkədən 141-i Rusiyanı qoşunlarını Ukraynanın beynəlxalq səviyyədə tanınmış ərazisindən dərhal çıxarmağa çağıran qətnaməni dəstəkləyib.



Bir gün əvvəl amerikalı həmkarı Co Baydenlə görüşən Moldova prezidenti Maya Sandu ölkəsinin Avropa İttifaqı (Aİ) üzvlüyünə daha inamlı addımlar atmaq üçün MDB sazişlərindən çıxmağa başladığını açıqlayıb. Bu arada Rusiya Moldovanı Moskvanın nəzarəti altında olan Dnestryanı bölgəsini blokada altına aldığını bildirib.



Ötən günün mənzərəsi ilə tanış olmaq üçün aşağıdakı xəbərləri də oxuya bilərsiniz:



İlham Əliyev və Paşinyan yenidən görüşə bilər - ABŞ-dan açıqlama

2022-ci ilin ən fəal deputatları - SİYAHI

Hərbi helikopterlərimiz havaya qaldırıldı - VİDEO

DYP-dən plyonka xəbərdarlığı: Cərimələnə bilərsiniz

Avtomobil bazarında son durum - Qiymətlər artır

MİQ imtahanları ilə bağlı DƏYİŞİKLİK

Ermənistanın Laçın yolu ilə bağlı vəsatəti ləğv edilib

Kredit faizləri artacaq, inflyasiya yüksələcək - Ekspertdən PROQNOZ

Çin Ukrayna müharibəsindən əziyyət çəkir - ŞƏRH

Türkiyə Ermənistana rədd cavabı verdi - Əvvəl Zəngəzur dəhlizi, sonra sərhəd…

Ramazan ayının təqvimi - İmsak-iftar vaxtı

Azərbaycan “Trendyol”a qarşı tədbirlər görə bilər

Vardanyan istefaya GÖNDƏRİLDİ

Vardanyanın yerinə gətirilən “Sorosun adamı” KİMDİR...

“Nə qədər separatçı varsa, hamısı gedəcək” - Vardanyanın qovulmasına REAKSİYA

“Qarabağ” Konfrans Liqasında mübarizəni dayandırdı