Prezident İlham Əliyevin uzaqgörən siyasəti Azərbaycanı dünyanın ən dinamik inkişaf edən dövlətləri sırasına çıxarıb
Prezident İlham Əliyevin rəhbərliyi ilə 20 il öncə həyata keçirilməyə başlanan uzaqgörən daxili və xarici siyasət Azərbaycanı dünyanın ən dinamik inkişaf edən dövlətləri sırasına çıxarıb.
Bu fikri açıqlamasında DOVLETXEBERLERİNƏ Elm və Təhsil Nazirliyinin Şərqi Zəngəzur Regional Təhsil İdarəsinin müdiri Fuad Bədəlov söyləyib.
Müdir qeyd edib ki, dövlətimizin başçısı Azərbaycanın iqtisadi və hərbi qüdrətinin, beynəlxalq nüfuzunun gücləndirilməsi yolunda böyük inam və qətiyyətlə çalışıb. Vətən müharibəsi günlərində döyüşən orduya tapşırıqlarını birbaşa özü verib. Müzəffər Ali Baş Komandan üçrəngli bayrağımızın 30 ildən sonra Qarabağda, Şərqi Zəngəzurda yenidən dalğalanmasına nail olub. Bu Qələbə regionda yeni reallıqların yaranmasına səbəb olub.
F.Bədəlov deyib: “Qələbəni şərtləndirən mühüm amillərdən biri də Azərbaycan Prezidentinin diplomatiya müstəvisində çevik siyasəti olub. Xalqımıza böyük qürur bəxş edən son hadisələr Vətən savaşında əldə olunan Zəfərdən sonra aparılan hərbi-siyasi proseslər məhz Prezidentimizin “Dəmir yumruğ”unun qəti qələbəsidir. Sentyabr ayında həyata keçirilən lokal miqyaslı antiterror tədbirləri nəticəsində ərazilərimizdə suverenliyimizin tam bərpası tarixi Zəfərin ildönümü ərəfəsində xüsusi əhəmiyyət kəsb edir”.
Azərbaycan Prezidentinin siyasət strategiyasının nəticələrindən danışan F.Bədəlov bildirib ki, ölkəmiz modernləşərək öz inkişafının yeni keyfiyyət mərhələsinə qədəm qoyub: “Hazırda ölkəmizdə bütün sahələrdə yenilənmə müşahidə olunur. Müasir Azərbaycanın qurucusu, Ulu Öndər Heydər Əliyevin siyasi kursunun layiqli davamçısı Prezident İlham Əliyev apardığı məqsədyönlü siyasət ilə ölkə iqtisadiyyatında sürətli və davamlı inkişafa nail olub. Azərbaycanın təşəbbüsü və iştirakı ilə həyata keçirilən transmilli layihələr qlobal iqtisadiyyatda mühüm rol oynayır. Energetika sektorunda əldə edilən nailiyyətlər nəinki ölkəmizin enerji müstəqilliyini təmin edib, həm də Avrasiyanın energetika xəritəsini dəyişdirib”.
Şərqi Zəngəzur Regional Təhsil İdarəsinin müdiri qeyd edib ki, ölkəmizin kosmik strategiyası uzunmüddətli perspektivə yönəlib və dövlət siyasətinin prioritet istiqamətlərindən birini təşkil edir. 2013-cü ildə ilk peykinin buraxılmasından sonra Azərbaycan kosmik klubun üzvü olub və bu gün kosmik fəzanın istifadəsi sahəsində fəaliyyətini 3 peyklə davam etdirir.
“Son iyirmi ildə Azərbaycan Respublikasının Prezidenti İlham Əliyevin rəhbərliyi altında bir çox sahələrdə olduğu kimi, elm sahəsində də böyük uğurlara imza atılıb. Ölkəmizdə elm, istehsal və sahibkarlığın birgə inkişafına dəstək verilir, Azərbaycanın yüksək texnologiyalar sahəsində inkişafı və beynəlxalq aləmə inteqrasiyasının sürətləndirilməsi, eləcə də qeyri-neft sektorları üzrə ideya və biliklərin dəstəklənməsi məqsədilə əhəmiyyətli layihələr həyata keçirilir, müxtəlif dövlət əhəmiyyətli sənədlər qəbul olunur.
Bu layihələrdən biri kimi 2016-cı il noyabrın 8-də Azərbaycan Respublikası Prezidentinin müvafiq Sərəncamı ilə yaradılmış AMEA-nın Yüksək Texnologiyalar Parkı (YTP) (indiki Elm və Təhsil Nazirliyinin Yüksək Texnologiyalar Parkı) elmi, innovativ layihələrin dəstəklənməsini, elmin kommersiyalaşdırılması işlərini uğurla həyata keçirir. Dövlətimizin başçısının “Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında” 2022-ci il 28 iyul tarixli Fərmanına əsasən, AMEA-nın bir sıra elmi müəssisələri ilə bərabər, Yüksək Texnologiyalar Parkı da hazırda fəaliyyətini Elm və Təhsil Nazirliyinin tabeliyində davam etdirir”.
DOVLETXEBERLERİ
Şərqi Zəngəzur Regional Təhsil İdarəsinin müdiri Fuad Bədəlov.
