“Prezident Administrasiyasının şöbə müdiri Ədalət Vəliyevin siyasi partiya təmsilçiləri ilə görüşü xüsusi əhəmiyyət kəsb edir. Azərbaycan müstəqil olandan sonra siyasi partiyalar cəmiyyətin həyatında müəyyən rol oynasalar da, sonradan tədricən zəiflədilər. Bir müddət sonra dini və etnik yönümlü partiyalar daha üstün mövqeyə gəldilər. Bu proses dünyəvi siyasət yürüdən partiyaların zəifləməsi ilə müşayiət olundu. Ölkə Prezidenti də istəyir ki, Azərbaycanda yeni, təklif verən, konstruktiv müxalifət olsun. Bizə işi-gücü mitinq keçirməkdən ibarət olan deyil, hadisələrə çevik reaksiya verən, konstruktiv təkliflərlə çıxış edən müxalifət lazımdır”.

Bu sözləri Yenisabah.az saytına açıqlamasında SİTM sədri, tanınmış politoloq Mübariz Əhmədoğlu deyib.

Prezident Administrasiyasının şöbə müdiri Ədalət Vəliyevin siyasi partiya təmsilçiləriylə görüşünü şərh edən politoloq daha sonra qeyd edib ki, yeniləşən Administrasiya dövlətin və cəmiyyətin qarşısında hansı vəzifələrin dayandığını yaxşı bilir: “Ədalət müəllimin gördüyü bu iş dövlətçiliyin, vətəndaş cəmiyyətinin qorunması istiqamətində atılan mühüm addımdır. Təqdirəlayiq haldır ki, bu görüşlər ölkədəki bütün siyasi spektri əhatə edir. Ədalət Vəliyevin siyasi partiya sədrləri ilə görüşü 1994-cü ildə ümummilli lider Heydər Əliyevin bu istiqamətdə həyata keçirdiyi siyasətin davamıdır. Bu ideyanı alqışlamaq, yaşatmaq lazımdır. Ağız büzməyə, kinayə ilə yanaşmağa ehtiyac yoxdur. Gedən proseslərin mahiyyətini düzgün başa düşmək lazımdır. Bu proses Azərbaycanın siyasi həyatında yeni seçim ortaya qoyur. Belə başa düşürəm ki, başlanan müzakirələr Azərbaycandakı partiyalaşmanı Qərb istiqamətinə aparacaq. Qərbdə də iki model var: Amerika və Avropa modeli”.

Ekspert tərəflər arasındakı görüşlərin iqtidar-müxalifət dialoqundan qat-qat üstün olduğunu söyləyib: “Azərbaycanda həmrəylik, milli birlik var. Əhalinin böyük əksəriyyəti Yeni Azərbaycan Partiyasını dəstəkləyir. Kiçicik azlıq var ki, onların da cəmiyyətdəki proseslərə böyük təsiri yoxdur. Bunu mən iqtidar - müxalifət primasından dəyərləndirməzdim. Bunu iqtidarın müxalifətə nəfəs verməsi prizmasından dəyərləndirərdim. Prezident deyir ki, Azərbaycana müxalifət lazımdır. Hansı ölkənin prezidenti deyir ki, ölkəyə müxalifət lazımdır? Hansı prezident müxalifət arzulayır ki? Prezidenti bilir ki, müxalifətsizlik cəmiyyətin normal inkişafına mane olur. Siyasi partiyalarla görüşü bu aspektdən dəyərləndirmək lazımdır. Yenə o fikrimə qayıdıram ki, cəmiyyətin dünyəvi inkişafı, sekulyar inkişafı hazırda gedən proseslərdən çox asılıdır”.

Xəbərnur