Gədəbəydə veteranın əməyinin qarşılığı verilmədi Rəsmi qurumlar məsuliyyəti üzərindən atır?

Redaksiyamıza müraciət edən Gədəbəy rayonu Slavyanka kənd sakini, veteran Niyazı Əsgərov Elşən oğlu bildirir ki, Gədəbəy rayon Mənzil Kommunal İstismar İdarəsinin rəisi Fuad Bayramov tərəfindən 3 ay qeyri-rəsmi şəkildə işlədilib və əmək haqqısı tam ödənilməyib. Onun sözlərinə görə, 3 ay ərzində gördüyü işin qarşılığı minimum 1300 manat təşkil etməli olduğu halda, ona cəmi 500 manat verilib. Qalan məbləğ isə indiyədək ödənilməyib.
Daha da narahatedici məqam ondan ibarətdir ki, redaksiyamıza verilən məlumata əsasən, idarə rəisi məsuliyyətdən yayınaraq başqa rayona gedib və vətəndaşı telefon zəngləri, eləcə də sosial şəbəkələr üzərindən bloklayıb. Bu hal problemin bilərəkdən ört-basdır edilməyə çalışıldığına dair ciddi şübhələr yaradır.
Redaksiyamıza müraciət edən veteran bildirir ki, məsələ ilə bağlı Gədəbəy Rayon İcra Hakimiyyətinə rəsmi müraciət edib, lakin aldığı cavab “bizim səlahiyyətimiz çatmır” formasında olub. Bu cavab isə cəmiyyətdə haqlı suallar doğurur: Əgər yerli icra orqanı öz ərazisində baş verən bu cür hallara reaksiya vermirsə, bəs vətəndaş hüququnu harada və kimdən tələb etməlidir?
Qazi və veteranların hüquqlarının qorunması dövlət siyasətinin əsas prioritetlərindən biri olduğu halda, bölgələrdə bu cür halların baş verməsi ciddi narahatlıq doğurur. Bir veteranın qeyri-rəsmi işlədilməsi, əmək müqaviləsi bağlanmaması və haqqının ödənilməməsi həm qanunvericiliyin pozulmasıdır, həm də mənəvi baxımdan qəbuledilməzdir.
Aidiyyəti qurumlara – Əmək və Əhalinin Sosial Müdafiəsi Nazirliyinə, Baş Prokurorluğa və Dövlət Əmək Müfəttişliyi Xidmətinə çağırış edirik: məsələ dərhal araşdırılsın, vətəndaşın hüquqları bərpa edilsin, günahı olan şəxslər məsuliyyətə cəlb edilsin.
Bu hadisə bir daha göstərir ki, bölgələrdə bəzi məmurlar vəzifə səlahiyyətlərindən sui-istifadə edərək sosial cəhətdən həssas təbəqənin veteranların və qazilərin belə haqqını tapdalamaqdan çəkinmirlər.