Bakı şəhəri, Nərimanov rayonu, Montin qəsəbəsi, Aşıq Qərib küçəsində yerləşən və “Azərbaycan Dəmir Yolları” QSC-nin ərazisində olan yaşayış evinin sakini olmuş Səfərov Rahib Xanbaba oğlu Azərbaycan Respublikasının Prezidenti cənab İlham Əliyevə müraciət edib.
Müraciətdə bildirilir ki, sözügedən ərazidə aparılan söküntü işləri nəticəsində ailəyə məxsus yaşayış evi sökülüb. Lakin söküntüdən artıq altı ay keçməsinə baxmayaraq, qanunvericiliklə nəzərdə tutulmuş kompensasiya “Azərbaycan Dəmir Yolları” QSC tərəfindən bu günədək ödənilməyib.
Səfərov Rahib qeyd edir ki, məsələ ilə bağlı dəfələrlə aidiyyəti qurumlara müraciət edilsə də, problem hələ də həllini tapmayıb. Nəticədə ailə ciddi maddi və sosial çətinliklərlə üz-üzə qalıb və uzun müddətdir yaşayış yerindən məhrum vəziyyətdədir.
Prezidentə ünvanlanan müraciətdə vətəndaş dövlət başçısının sosial ədalət və vətəndaş rifahı ilə bağlı çıxışlarına istinad edərək, yaranmış vəziyyətin obyektiv araşdırılmasını və ailəsinə düşən kompensasiyanın qanunvericiliyə uyğun şəkildə qısa müddətdə ödənilməsi üçün aidiyyəti qurumlara tapşırıq verilməsini xahiş edir.
Müraciətdə həmçinin qeyd olunur ki, vətəndaş problemin Prezidentin diqqəti və nəzarəti sayəsində ədalətli həllini tapacağına ümid edir.