Laçın rayonu üzrə yüksək balla ali təhsil müəssisələrinə qəbul olan tələbələrlə görüş keçirilmişdir.
Görüşdə Laçın Rayon İcra Hakimiyyətinin başçısı Aqil Nəzərli çıxış edərək tələbə adını qazanan gəncləri təbrik etmiş, onlara təhsildə və gələcək həyatlarında uğurlar arzulamış, savadlı və peşəkar mütəxəssis kimi yetişmələrini və Vətənə ləyaqətlə xidmət göstərmələrini tövsiyə etmişdir.
Ölkə başçısı cənab İlham Əliyevin və Birinci Vitse-prezident Mehriban xanım Əliyevanın təhsilin inkişafını həmişə diqqətdə saxladığını və bu istiqamətdə mühüm tədbirlər həyata keçirdiyini vurğulayan rayon rəhbəri qeyd etmişdir ki, bu günkü görüş Azərbaycan Respublikası Prezidentinin “Azərbaycan Respublikasında Dövlət Suverenliyi Gününün təsis edilməsi haqqında” 2024-cü il 19 sentyabr tarixli 294 nömrəli Sərəncamına əsasən hər il sentyabrın 20-sinin Azərbaycan Respublikasında Dövlət Suverenliyi Günü kimi qeyd edildiyi tarixi bir günə təsadüf edir. Belə ki, erməni silahlı quldur dəstələrinə qarşı cəmi 23 saat davam etmiş və 2023-cü il sentyabrın 20-də başa çatmış antiterror əməliyyatları nəticəsində rəşadətli Azərbaycan Ordusu qarşısına qoyulmuş bütün vəzifələri yüksək peşəkarlıqla yerinə yetirərək, növbəti parlaq Qələbə nəticəsində dövlətimizin suverenliyi tam bərpa edilmiş, Azərbaycan xalqının həyatında müstəsna əhəmiyyət kəsb edən şanlı Zəfər sayəsində bu gün Azərbaycan Respublikasının Dövlət Bayrağı suverenliyimizin bərqərar olduğu bütün ərazilərdə əzəmətlə dalğalanmaqdadır.
Görüşdə qeyd edilmişdir ki, 2025-ci ildə Laçın rayonunun ümumtəhsil məktəblərinin 11-ci sinfi bitirmiş 1051 nəfər məzundan 893 nəfəri ali məktəblərə sənəd vermiş, 504 nəfəri ali məktəblərə qəbul olunmuşdur. Tələbə adını qazananlardan 111 nəfəri 500-dən, onlardan isə 37 nəfəri 600-dən çox bal toplayaraq yüksək nəticə göstərmişdir.
Tələbələrlə səmimi söhbət edən rayon rəhbəri Aqil Nəzərli bir daha onlara ən xoş təbriklərini çatdıraraq təhsillərinin növbəti mərhələlərində də onlara uğuralar arzulayaraq, ümidvar olduğunu bildirmişdir ki, ali təhsil alaraq savadlı, bilikli, bacarıqlı gənc kadr kimi müstəqil Azərbaycanımızın inkişafı və tərəqqisi naminə görülən işlərə öz layiqli töhfələrini verəcəklər.
Görüşdə təhsildə fərqlənmiş, qəbul imtahanlarında 600-dən çox bal əldə edərək ali məktəblərə qəbul olmuş 37 nəfər tələbə qiymətli hədiyyələrlə mükafatlandırılmış, təhsil sahəsində uğurlar qazanmış 11 nəfər qabaqcıl təhsil işçisi Laçın Rayon İcra Hakimiyyətinin Fəxri Fərmanları ilə təltif edilmişlər.
Görüşdə çıxış edən Şərqi Zəngəzur Regional Təhsil İdarəsinin Laçın Rayonu üzrə Təhsil Sektorunun müdiri Nicat Həsənov, ümumtəhsil məktəblərinin direktorları və tələbələr Laçın rayonunda təhsilə göstərilən davamlı diqqət və qayğıya görə ölkə rəhbərliyinə dərin minnətdarlıqlarını bildirmişlər.
Tədbirin sonunda görüş iştirakçıları ilə xatirə şəkli çəkdirildi.
