Millət vəkili fiziki məhdudiyyətli uşaqlar üçün tədbir keçirib

Xebernur.com xəbər verir ki, millət vəkili, “Ana Vətən” Partiyasının sədr müavini Günay Ağamalı Bakıda fiziki məhdudiyyətli uşaqlar üçün genişmiqyaslı tədbir təşkil edib.

“Ana Vətən” Partiyasının təşəbbüsü, partiyanın Binəqədi rayon təşkilatının sədri və “Vətən Sağ Olsun” xeyriyyə cəmiyyətinin rəhbəri Püstəxanım Hüseynovanın təşkilatçılığı ilə 3 Dekabr – Beynəlxalq Əlillər Günü münasibətilə keçirilən tədbirdə çoxsaylı qonaqlar iştirak ediblər.

Tədbiri giriş sözü ilə açan millət vəkili, “Ana Vətən” Partiyasının sədr müavini Günay Ağamalı Beynəlxalq Əlillər Günü münasibətilə iştirakçıları salamlayaraq onlara xoş arzularını çatdırıb. O, çıxışında fiziki məhdudiyyətli şəxslərin cəmiyyətimizdə bərabər hüquqlu və layiqli mövqeyə malik olduğunu vurğulayıb.

Günay Ağamalı qeyd edib ki, ölkəmizdə xüsusi qayğıya ehtiyacı olan şəxslərin elm və təhsil, idman, mədəniyyət və sosial həyatın bütün sahələrinə inteqrasiyası istiqamətində mühüm addımlar atılır. Bildirilib ki, fiziki məhdudiyyətli şəxslər hər zaman Möhtərəm Prezidentimiz İlham Əliyevin və Birinci vitse-prezident Mehriban xanım Əliyevanın diqqət və qayğısını hiss edir, onların cəmiyyətə tam inteqrasiyası və həyatlarının daha rahat qurulması üçün ardıcıl tədbirlər həyata keçirilir.

Tədbirdə çıxış edən “Ana Vətən” Partiyasının Binəqədi rayon təşkilatının sədri, “Vətən Sağ Olsun” xeyriyyə cəmiyyətinin rəhbəri Püstə Hüseynova fiziki məhdudiyyətli şəxslərin cəmiyyətə tam inteqrasiyasının və sosial rifahının yüksəldilməsinin hər bir vətəndaşın borcu olduğunu bildirib. O, vurğulayıb ki, AVP-nin Binəqədi rayon təşkilatı və “Vətən Sağ Olsun” xeyriyyə cəmiyyəti bundan sonra da xüsusi qayğıya ehtiyacı olan insanlara mənəvi və sosial dəstəyini davam etdirəcək.