Qaradağ rayonunun Səngəçal qəsəbəsində yağan güclü yağışlar bir daha acı reallığı ortaya qoydu. Ərazilər su altında qalıb, həyətlər gölə çevrilib, yollar isə keçilməz vəziyyətə düşüb. Sakinlər sözün əsl mənasında çıxılmaz durumda qalıb.

Yayılan görüntülərdən də aydın görünür ki, su basmış həyətlərdə həyat iflic olub. Bu isə bir günlük problem deyil illərdir yığılıb qalan laqeydliyin nəticəsidir. Hər yağışda eyni mənzərə təkrarlanır, amma məsul qurumların reaksiyası dəyişmir.

Xüsusilə Azərsu ASC tərəfindən görülməli olan kanalizasiya və drenaj işlərinin yerinə yetirilməməsi vəziyyəti daha da ağırlaşdırıb. Sual yaranır: paytaxtın bir hissəsi olan Səngəçal niyə bu vəziyyətdədir?
Digər tərəfdən, rəsmi çıxışlarda problemlərin həllindən danışılır, lakin reallıq tamam fərqlidir. Sakinlər isə hər yağışdan sonra eyni çətinlikləri yaşamaq məcburiyyətində qalır.
Səngəçal qəsəbəsi artıq unudulmuş əraziyə çevrilib. Aidiyyəti qurumlar bu vəziyyətə dərhal müdaxilə etməli, konkret və davamlı tədbirlər görməlidir. Əks halda, hər yağan yağış bu qəsəbə üçün növbəti fəlakət demək olacaq.