Müstəqil Azərbaycan dövlətinin daxili sabitliyinin, asayişinin və vətəndaş təhlükəsizliyinin təmin olunmasında Daxili İşlər Orqanlarının əvəzsiz rolu var. Bu gün Azərbaycan vətəndaşı öz evində, işində, küçədə və yollarda özünü tamamilə təhlükəsiz hiss edirsə, bu, hüquq-mühafizə orqanlarının, xüsusilə də Azərbaycan polisinin gecə-gündüz apardığı gərgin və peşəkar fəaliyyətin birbaşa nəticəsidir. Kriminal durumun tam nəzarətdə saxlanılması dövlətin gücünü, polisin isə xalqla sarsılmaz birliyini nümayiş etdirir.

Bu gün 102-ci yaşını qeyd edən Azərbaycan polisini xarakterizə etmək üçün yaxın keçmişə -1990-cı illərin əvvəllərinə nəzər salmaq kifayətdir. Həmin dövrdə ölkədə hökm sürən anarxiya, dövlət idarəçiliyinin iflic olmuş, cinayətkarlıq və silahlı dəstələrin təsir gücü artmışdı. Lakin Ulu Öndər Heydər Əliyevin hakimiyyətə qayıdışı və Prezident İlham Əliyevin rəhbərliyi altında həyata keçirilən köklü islahatlar bu mənzərəni tamamilə dəyişdi.
Bu gün dövlət başçısının diqqət və qayğısı sayəsində Azərbaycan polisi ən müasir texnologiyalarla, intellektual idarəetmə sistemləri (məsələn, "Təhlükəsiz Şəhər" kompleksi) ilə təchiz olunub. Maddi-texniki bazanın gücləndirilməsi, əməkdaşların sosial müdafiəsinin yüksək səviyyəyə qaldırılması və yüksək hazırlıqlı kadr korpusunun formalaşdırılması polisi operativ, effektiv və sivil bir struktura çevirib.



Azərbaycan polisinin fəaliyyəti yalnız şəhər küçələrində asayişi qorumaqla məhdudlaşmır. Daxili İşlər Orqanlarının əməkdaşları və Daxili Qoşunların şəxsi heyəti həm Birinci, həm də İkinci Qarabağ müharibəsində ön cəbhədə qəhrəmancasına vuruşub, yüzlərlə şəhid verib.
44 günlük Vətən müharibəsində və 2023-cü ilin lokal antiterror əməliyyatlarında polis əməkdaşları Azərbaycan Ordusu ilə çiyin-çiyinə döyüşərək tarixi Zəfərimizə öz böyük töhfələrini veriblər. Bu döyüşlərdə göstərdikləri şücaətə görə bir çox polis əməkdaşı dövlətin ən ali mükafatlarına, o cümlədən "Vətən Müharibəsi Qəhrəmanı" adına layiq görülüb.
Eyni zamanda, Laçın dəhlizində keçirilən ekoloji aksiya zamanı polisin nümayiş etdirdiyi yüksək təmkin və peşəkarlıq yaddaşlardan silinməyib. Dinc aksiya iştirakçılarının təhlükəsizliyini qoruyan qanun keşikçiləri sübut etdilər ki, onlar təkcə adi cinayətkarlıqla deyil, həm də dövlətimizə qarşı yönələn ekoloji terrora qarşı mübarizədə də xalqın yanındadırlar.

Azərbaycan polisi ən çətin böhranlar və təbii fəlakətlər zamanı da fədakarlığı ilə seçilib. Bütün dünyanı iflic edən COVID-19 pandemiyası dövründə polislərimiz gecə-gündüz küçələrdə karantin qaydalarına nəzarət edir, eyni zamanda sosial təcrid olunmuş yaşlı və kimsəsiz vətəndaşlara humanitar yardımlar daşıyırdılar. İstər sel, zəlzələ kimi təbii fəlakətlərdə, istərsə də ölkəmizin ev sahibliyi etdiyi irimiqyaslı beynəlxalq, kütləvi tədbirlərdə polis gücləndirilmiş rejimdə çalışaraq hər bir vətəndaşın və qonağın burnunun belə qanamaması üçün sipər olub.

Bu gün daxili sabitliyi qorumaqla yanaşı, Azərbaycan polisi beynəlxalq terrorizm, narkotrafik, insan alveri və transsərhəd cinayətkarlıqla mübarizədə qlobal tərəfdaşları ilə uğurlu əməkdaşlıq aparır. Beynəlxalq reytinqlərdə Azərbaycanın dünyanın ən təhlükəsiz ölkələrindən biri kimi qərarlaşması bu uğurlu siyasətin bariz nümunəsidir.
Ən əsası isə odur ki, bu gün Azərbaycanda sarsılmaz bir "Xalq-Polis birliyi" mövcuddur. Vətəndaşlarımız polisə baxanda təkcə cəza verən bir orqan deyil, öz hüquqlarının müdafiəçisini, hər hansı çətinlikdə köməyə qaçacaq etibarlı dostunu görür. Bu etimadı qazanmaq və qorumaq Azərbaycan polisinin ən böyük zəfəridir.