Ulu Öndər Heydər Əliyevin hakimiyyətə qayıdışı ilə inkişafın sarsılmaz təməli qoyuldu.

Milli Qurtuluş Günü Azərbaycanın taleyini dəyişən zəfər tarixidir. Bu gün böyük ictimai, siyasi və tarixi əhəmiyyətə malik bir gündür. Çünki 20-ci əsrin sonlarında yenicə müstəqillik əldə etmiş Azərbaycan qısa vaxtdan sonra onun itirilməsi təhlükəsi ilə üzləşdi. 1991- 1993-cü illər ölkəmizin tarixində hərc- mərclik, özbaşınalıq, xaos dövrü kimi xatırlanır. Ovaxtkı rəhbərlərin səriştəsizliyi, xarici və daxili şər qüvvələrin xəyanəti ucbatından ölkəmizdə vəziyyət vətəndaş müharibəsi həddinə gəlib çatmışdır.
Bir tərəfdən işğalçı Ermənistanın doğma torpaqlarımızı zəbt etməsi, digər tərəfdən isə xarici qüvvələrin təsiri altında olan daxili düşmənlərin fəaliyyətsizliyi Azərbaycanı parçalanmağa və məhvə doğru aparırdı. Məhz belə bir vaxtda Ümummilli liderimiz Heydər Əliyev xalqın təkidi və xahişi ilə böyük təzyiqlərə baxmayaraq hakimiyyətə gəldi. Ulu Öndərimizin qayıdışı ilə ölkəmiz məhvolma təhlükəsindən xilas oldu, qardaş qırğınının qarşısı alındı, Ermənistanın yeni torpaqlar işğal etmək cəhdlərinin qarşısı alınaraq, uğurlu əks- hücum əməliyyatları nəticəsində Füzuli istiqamətində ermənilər geri çəkilməyə məcbur edildilər.
Bundan sonra iqtisadiyyatı inkişaf etdirmək üçün uğurlu siyasət aparıldı. Neft strategiyası ölkəmizin qüdrətlənməsi yolunda atılmış ən mühüm addımlardan biri oldu.
Ötən illər ərzində Azərbaycan böyük inkişaf yolu keçib. Ölkəmizin inkişaf strategiyası məhz Ulu Öndərimiz Heydər Əliyev tərəfindən müəyyənləşdirilib.
Azərbaycanın gələcəyi daha işıqlı və firavan görünür. Çünki müstəqil Azərbaycanın idarəçilik sükanı Ulu Öndərimiz Heydər Əliyevin layiqli davamçısı möhtərəm Prezidentimiz İlham Əliyevin əlindədir.

YAP Xocalı rayon ərazi partiya təşkilatının sədri Zülfü Quliyev.