Azərbaycanda icbari tibbi sığorta sisteminin tətbiqindən sonra dövlət xəstəxanalarında ştat strukturlarının yenidən qurulması, bəzi kadrların ixtisarı və bölgələr üzrə yenidən paylanması məsələsi gündəmdədir.

Mövzu ilə bağlı sorğuya cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib ki, hazırda qurumun tabeliyindəki tibb müəssisələrində kadr təminatı, ştat vahidləri və insan resurslarının vəziyyəti üzrə genişmiqyaslı təhlillər və optimallaşdırma tədbirləri həyata keçirilir.

"Beynəlxalq praktikada səhiyyə insan resurslarının planlaşdırılması yalnız ümumi say göstəricilərinə əsaslanmır. Ümumdünya Səhiyyə Təşkilatı və İqtisadi Əməkdaşlıq və İnkişaf Təşkilatının yanaşmalarında kadrların bölgüsü, xidmətlərə çıxış imkanları, faktiki iş yükü və səhiyyə xidmətlərinə olan tələbat əsas qiymətləndirmə meyarları hesab olunur".

Qurumdan verilən məlumata görə, Azərbaycanda tibb kadrları ilə təminat qənaətbəxş səviyyədə olsa da, tibb işçilərinin paylanmasında regionlar üzrə ciddi fərqlər mövcuddur:

"Əhalinin hər 1000 nəfərinə 7,81 nəfər həkim, tibb bacısı və mama düşür. Bu da ÜST tərəfindən müəyyən edilmiş hər 1000 nəfərə 4,45 göstəricisindən artıqdır. “Bir Baxışda Sağlamlıq 2025 İƏİT Göstəriciləri” (Health at a Glance 2025 OECD Indicators) hesabatına əsasən İqtisadi Əməkdaşlıq və İnkişaf Təşkilatı (İƏİT) ölkələrində rəhbərlər və digər heyət orta hesabla xəstəxana işçilərinin 4-də 1-ni, yardımçı heyət isə (kiçik tibb işçiləri) orta hesabla xəstəxana işçilərinin 10% - ni təşkil edir. Təqdim olunan göstəricilər insan resurslarının planlaşdırılması zamanı yalnız ümumi say göstəricilərinin deyil, həm də kadrların bölgüsünün, faktiki iş yükünün və səhiyyə xidmətlərinə olan tələbatın nəzərə alınmasının vacibliyini göstərir. Kadr təminatı və ştat strukturları üzrə müəyyən fərqlər həm regionlar arasında, həm də ayrı-ayrı ərazilər, o cümlədən Bakı və Sumqayıt şəhərləri üzrə müşahidə olunur".

Qurum xüsusilə vurğulayıb ki, tibb müəssisələrində planlaşdırılan optimallaşdırma tədbirləri maliyyə ixtisarlarına yönəlməyib:

"Həyata keçirilən tədbirlər maliyyələşmənin azaldılmasına deyil, ayrılan dövlət resurslarının daha səmərəli idarə olunmasına xidmət edir. Bu yanaşma səhiyyə və icbari tibbi sığorta sisteminə ayrılan vəsaitlərin birbaşa vətəndaşlara göstərilən tibbi xidmətlərin keyfiyyətinin və əlçatanlığının artırılmasına yönəldilməsini təmin edəcək".

TƏBİB-dən həmçinin bildirilib ki, optimallaşdırma ilə bağlı bütün qərarlar Azərbaycan Respublikasının əmək qanunvericiliyinin tələblərinə tam uyğun qaydada, mərhələli və tam əsaslandırılmış şəkildə qəbul edilir.