Aramızdan cismani ayrılmasının ikinci il dönümündə Dədə Şəmşir ruhunun daşıyıcısı Qənbər Şəmşiroğlunu rəhmət və hörmətlə anırıq. Qəlbi vətən, torpaq üçün çırpınan, ölkəsi, xalqı üçün yazıb-yaradan ağsaqqal ziyalımız Qənbər Şəmşiroğlu xalqımızın əziz xatirəsində əbədi olaraq yaşayacaqdır. O həyat fəaliyyəti boyunca səmimiyyəti, işgüzarlığı, yüksək insani keyfiyyətləri ilə xalqın sevimlisinə çevrilmiş, müstəsna fəaliyyətinə görə “Şərəf nişanı” ordeni, “Əmək igidliyinə görə”, “Əmək veteranı” və "Tərəqqi" medalları ilə təltif edilmişdir. Bütün bu müsbət keyfiyyətləri ilə hələ sağlığında "Xalqın adamı" adına layiq görülən Qənbər Şəmşiroğlu həm də görkəmli dövlət adamı, peşəkar rəhbər kimi tanınmağı bacarmışdı. Qənbər Şəmşiroğlu, Kəlbəcər rayon məktəbində müəllim, məktəb direktoru, Kəlbəcər rayon Partiya Komitəsində təbliğat-təşviqat şöbəsinin müdiri vəzifələrində çalışıb. Həmçinin, Azərittifaqda baş müşavir, Kəlbəcər RPK-nın ikinci katibi, Kəlbəcər RİK-in sədri, Gədəbəy RİK-in sədri, Gədəbəy rayon İcra Hakimiyyətinin başçısı, Kəlbəcər rayon İcra Hakimiyyətinin başçısı kimi yüksək vəzifələrində işləyib. Onun rəhbərlik etdiyi “Aşıq Şəmşir” Mədəniyyət Ocağı İctimai Birliyi yarandığı gündən mədəniyyətimizin, ədəbiyyatımızın, incəsənətimizin, milli-mənəvi dəyərlərimizin, aşıq sənətinin qorunub yaşadılması və digər sahələr üzrə ölkə daxilində və xaricdə müxtəlif tədbirlər həyata keçiribdir. Qənbər müəllimin birbaşa rəhbərliyi ilə Birlik Ulu öndərimiz Heydər Əliyevin irsinin öyrənilməsi və gənc nəslə aşılanması ilə bağlı mütəmadi olaraq silsilə təbirlər həyata keçirmişdir. O, Azərbaycan Yazıçılar Birliyinin üzvü və Respublika Ağsaqqallar Şurası Rəyasət Heyətinin üzvü olaraq, onlarla kitabın müəllifi kimi şöhrət qazanmışdır. Qənbər müəllim Dədə Şəmşir dünyasını dəyişdikdən sonra, ulu babası, XVI əsrin sufi şairi, övliya Miskin Abdalın adıyla bağlı olan o müqəddəs ocağın varisi, şair Qurban irsinin, Dədə Şəmşir yurdunun ağsaqqalı oldu. Qənbər müəllim ulu babalardan süzülüb gələn ənənələri qoruyub yaşatdı, bu yaradıcılıq bulağının suyunu öz ilhamı ilə daha da gur etdi. Onun şeirlərində həyata, insana, təbiət gözəlliklərinə, ailə dəyərlərinə yüksək sevgi və ehtiram, yaradıcılığında təpədən-dırnağa vətənin haqq aşiqliyi vardı. Müzəffər Ali Baş Komandanımızının torpaqlarımızı düşmən işğalından azad etməsi, o qəhramanlıq səlnaməsi bəlkə də Qənbər müəllim üçün ən böyük hədiyyə oldu. Çünki o hər zaman bu qələbəyə əmin idi. Cənab prezidentimiz İlham Əliyevə sonsuz inam göstərir, söhbətlərində hər zaman bunu dilə gətirirdi. Bu gün bütün torpaqlarımız kimi, o müqəddəs ocaq da artıq öz həqiqi sahiblərinin nəzarətindədir. O, Qənbər Şəmşiroğlu imzası ilə bu gün də yaşayır, sabah da yaşayacaq! Qənbər müəllim dərin zəkası, müdrikliyi ilə bizlərə böyük mənəvi sərvət bəxş etmişdir. Qənbər müəllim kimi ağsaqqallarımızı, ziyalılarımızı dərindən öyrənmək və onun irsinə bir azərbaycanlı kimi sahib çıxmaq bizlər üçün ali bir öhdəlikdir. Allah rəhmət eləsin.
