Qaraçuxur qəsəbəsinin sakinləri içməli su problemindən və kanalizasiya sisteminin bərbad vəziyyətdə olmasından əziyyət çəkirlər.

Bu haqda Qaraçuxur qəsəbəsi şimal yaşayış massivi, 16-cı döngənin sakinləri KONKRET.az-ın redaksiyasına ünvanladıqları şikayət məktubunda yazıblar.

Sakinlərin sözlərinə görə, hökumət tərəfindən qəsəbənin içməli su və kanalizasiya təchizatının yaxşılaşdırılması məqsədi ilə vəsait ayrılıb və bu istiqamətdə müəyyən işlər görülüb. Lakin görülən işlər Qaraçuxur qəsəbəsi, şimal yaşayış massivi, 16-cı döngə ərazisinə çatanda dayandırılıb.

Elə problem də bundan sonra yaranıb. Sözügedən ərazidə yaşayan İsgəndər Mehdiyev adlı sakin bildirir ki, podratçı şirkət təxminən 200-300 metr ərazinin kanalizasiya xəttinin yenilənməsini təxirə salıb. Eyni zamanda içməli su xətti yarımçıq kanalizasiya sisteminin üstü ilə çəkilib. Sakinlər deyir ki, əgər kanalizasiya xətti zədələnərsə, o zaman içməli suyun çirklənməsi qaçılmaz olacaq. Bu isə öz növbəsində əhalinin sağlamlığı üçün birbaşa təhlükə deməkdir.

Bundan başqa aparılan təmir-tikinti işləri ilə əlaqədar olaraq yol örtüyü də sıradan çıxıb. Drenaj və kanalizasiya xəttlərinin olmaması səbəbindən qurunt və yağış suları sakinlərin evlərinə dolub. Eləcə də yoldakı çuxurların su ilə dolması ərazini keçilməz edib.

Sakinlər sözügedən problemlə bağlı “Azərsu ASC”-yə, eləcə də Suraxanı rayon İcra Hakimiyyətinə və Sukanal idarəsinə dəfələrlə müraciət etdiklərini bildirirlər. Yalnız “Azərsu ASC”-dən rəsmilər gələrək mövcud problemlə yerindəcə tanış olublar. Bu ərazidə təmir işlərinin davam etdirilməsinin zəruriliyini vurğulayıblar. Suraxanı rayon Sukanal idarəsinin və İcra Hakimiyyətinin rəhbərliyi isə dəfələrlə ediilən şikayətlərə baxmayaraq, insanların problemləri ilə maraqlanmayıb.

Sözügedən problemlə əlaqədar Azərsu ASC-nin mətbuat xidmətinin rəhbəri Anar Cəbrayıllı ilə əlaqə saxlayaraq məsələyə münasibət öyrənməyə çalışdıq. Qurumun sözçüsü problemdən xəbərdar olduqlarını dilə gətirib: “Həmin ərazi ilə bağlı lahiyə mövcuddur və artıq təsdiqlənib. Lahiyə çərçivəsində bu il sözügedən ərazidə təmir-yenidənqurma işləri icra olunacaq. Ötən il lahiyə həmin əraziyə qədər icra olunub. Yəni işlər yarımçıq saxlanılmayıb, həmin əraziyə qədər görülüb. Bu il də işlər davam etdiriləcək və təxminən 2 ay ərzində yekunlaşdırılacaq”.

İndi Qaraçuxur qəsəbəsi şimal yaşayış massivi, 16-cı döngənin sakinlərinə iki ay səbr etmək qalır. Ümid edirik ki, iki aydan sonra həmin ərazidə yaşayan sakinlərin problemləri öz müsbət həllini tapacaq.



Xəbərnur