Respublikanın tanınmış vəkili Adəm Məmmədov AMEA-nın intihar etmiş tarixçi-arxeoloq alimi Emil İsgəndərovun yaxınlarının müraciəti əsasında onların hüquqlarını müdafiə edəcək

2022-ci ilin may ayının 22-də baş verən və ölkədə geniş rezonans doğuran intihar hadisəsi, eləcə də onun səbəbləri hazırda da ictimai rəyin diqqəti mərkəzində qalmaqdadır. Xatırladaq ki, həmin tarixdə AMEA-nın Arxeologiya, Etnoqrafiya və Antropologiya İnstitutunun Arxeoloji irsin tarixi və nəzəriyyəsi şöbəsinin aparıcı elmi işçisi Emil Əlisahib oğlu İsgəndərovun evində intihar etdiyi məlum olub. Belə ki, 41 yaşlı alim yaşadığı Nəsimi rayonu Kövkəb Səfərəliyeva küçəsindəki mənzildə müxtəlif adda dərman həbləri içərək həyatına son qoyub. Məlumatlara görə, hadisə yerinə baxış keçirilərkən onun yanında 4 qutu boş antidepressant aşkar edilib. Məlum olub ki, Emil İsgəndərli qutulardakı dərmanların hamısını içərək həyatına qəsd edib.

Yaxınlarının iddialarına görə, məhz həmin şübhələr öz təsdiqini tapdıqdan sonra Emil həyatına son qoymaq qərarına gəlib!

Lakin onu da qeyd edək ki, alimin intihar etməsi səbəbləri üzə çıxdıqdan sonra bu olay cəmiyyətdə də dəhşət hissləri oyadıb və Emil İsgəndərovun anası Natəvan İsgəndərova hadisənin təfərrüatları və ehtimalları əsasında mətbuata açıqlamasında qeyd edib ki, oğlu Emilin həyatında heç bir problemi olmayıb. Mərhum övladı isə öz ailəsinə, yaxınlarına, dostlarına, əsasən də sevimli işinə daim sədaqət nümayiş etdirib. Emil bəy xüsusilə övladlarına, həmçinin, həyat yoldaşı Gülnarə Balakişiyevaya qarşı hədsiz dərəcədə diqqətli olub, yüksək qayğı nümayiş etdirib. Lakin bunun müqabilində Emil həyat yoldaşından biganəlik, etinasızlıq, eləcə də qeyri-səmimilik görüb və onda öz həyat yoldaşı haqqında şübhələr yaranmağa başlayıb. Onun yaxınlarının iddialarına görə, məhz həmin şübhələr öz təsdiqini tapdıqdan sonra Emil həyatına son qoymaq qərarına gəlib. Bu barədə ölkə mətbuatında da geniş yazılıb və həmin informasiyalardan birinin linkini hörmətli oxucu auditoriyamıza təqdim edirik.

Emil İsgəndərovun həyat yoldaşı Gülnarə Balakişiyeva qayınanası Natəvan İsgəndərovaya qarşı mülk iddiası ilə çıxış edir

Mərhum alimin anası və qardaşı – Natəvan İsgəndərova və Anar İsgəndərov qeyd ediblər ki, Emil İsgəndərovun həyat yoldaşı Gülnarə Balakişiyeva onlara qarşı əlində heç bir əsası olmadan mülk iddiası qaldırıb. Eləcə də, Emil bəyin yaxınları mənəvi təsirlər göstərdiyinə görə qarşı tərəfə təzminat davası qaldıracaqlarını da bildiriblər. Bu baxımdan, sözügedən məsələ ilə bağlı məhkəmə prosesinin başlanacağı, baş verənlərə hüquqi qiymətin veriləcəyi faktı artıq dəqiqləşdirilib.

Gülnarə Balakişiyevanın hansı yaxınları vasitəsi ilə KİV-lərə təzyiqlər olub?

Daha bir məqamı da qeyd edək. Belə ki, haqqında bəhs edilən mövzu ilə bağlı Emil İsgəndərovun anası və qardaşı tərəfindən verilən açıqlamalar, eyni zamanda video-müsahibə ölkə KİV-lərində ictimailəşdirildikdən sonra Gülnarə Balakişiyevanın yaxınları tərəfindən müəyyən media qurumlarına təzyiqlər olub.

Sonda daha bir məqamı da xatırladaq ki, mərhum alim Emil bəyin anası, qardaşı və digər ikinci dərəcəli ailə üzvləri istintaq işinin tam şəffaf aparılmasının təmin olunması üçün ölkə Prezidenti Cənab İlham Əliyevə, ölkəmizin Birinci xanımı Mehriban Əliyevaya, Daxili İşlər Naziri Vilayət Eyvazova, Ədliyyə Naziri Fikrət Məmmədova, Respublikanın Baş Prokuroru Kamran Əliyevə tələb olunan müvafiq qaydalar əsasında rəsmi müraciət ərizəsi təqdim edəcəklər.