Qəhrəman Şəhidimiz Elgün Ağayar oğlu Abbaslının anım günü ilə əlaqədar Sumqayıt şəhidlər xiyabanında məzarını ziyarət etdik.
Şəhid Elgin Ağayar oğlu Abbaslı 1991-ci il mayın 16-da Laçın rayonunun Dəyhan kəndində anadan olub. Laçının işğalından sonra valideynləri Sumqayıt şəhərinin Sarıqaya qəsəbəsində müvəqqəti məskunlaşıblar. Elgin orta məktəbi bitirib həqiqi hərbi xidmətə yollanıb və sonra müddətdən artıq həqiqi hərbi xidmət qulluqçusu olub. 2014-cü ildən “N” saylı hərbi hissədə tibbi xidmət bölüyündə xidmət eləyib. Hələ uşaq ikən hərb sahəsini sevən Elgin Vətən müharibəsində böyük həvəslə iştirak edib. Valideynlərinə Laçının işğaldan azad olması xəbərini vermək ən böyük arzusu olub.O, Cəbrayılın, Füzulinin, Zəngilanın, Qubadlının, Laçının və Şuşanın azadlığı uğrunda gedən döyüşlərdə qəhrəmanlıqla vuruşub.
2020-ci il noyabrın 10-da Şuşa istiqamətində gedən döyüşlərdə Elgingilin maşını ermənilər tərəfindən atəşə tutulub, Elgin yaralanıb, lakin buna baxmayaraq, geri çəkilməyib, şəhid olmuş komandirinin nəşini ərazidən çıxararkən vurularaq şəhidlik zirvəsinə ucalıb.
Sumqayıtda Şəhidlər xiyabanında dəfn edilib.
Qələbə günü şəhidlik məqamına yüksələn Elgin Abbaslı ölümündən sonra “Şuşanın azad olunmasına görə”, “Füzulinin azad olunmasına görə”, “Vətən uğrunda” medalları ilə təltif edilib.
