“Biz Xocalıdayıq, siz haradasınız?” - Xocalının deputatından Koçaryanla Sarkisyana ÇAĞIRIŞ
O, Xocalı soyqırımından, Xocalının keçmişindən, bu günündən və gələcəyindən danışıb.
Müsahibənin bir hissəsini təqdim edirik:
- İşğal dövründən sonra ermənilər Xocalıda qızıl axtarıb-tapmaq üçün bütün qəbirləri yerlə-yeksən etmişdilər. Bir-iki ay bundan öncə yenə Xocalıya getmişdim. Həyat yoldaşım da yanımda idi. Atamın-qardaşımın qəbrinə adları yazılan dəmirdən baş daşı düzəltmişdik, onları aparırdım ki məzarları bilinsin.
Yol boyu ermənilərin işğal etdiyi ərazilərdə tikdiyi dəbdəbəli evləri gördüm. Həmin evlərdən biri də Xocalıda soyqırım törədənlərdən biri Vitali Balasanyana aid olub. Balasanyanın evi Əsgərandadır, ora çatanda maşını saxlayıb onun evində dayanıb dedim: "Mən buradayam, sənin evinin yanında durmuşam. Sən haradasan?"
Mən Sarksiyanı da, Köçəryanı da tanıyırdım, onlarla birlikdə çörək belə yemişdik, zəhərləri olsun. Sonra da Qarabağı işğal edib, xalqı öz dədə-baba yurdundan didərgin salmaları bəs deyilmiş kimi soyqırım da törətdilər, ananın gözü qabağında övladının başını kəsdilər, uşaqların yanında ana-atalarını yandırdılar. Onlara da çağırış edirəm, bu gün biz Azərbaycandayıq, Xocalıdayıq siz haradasınız?
İlahi ədalətə və dövlətin gücünə inamı sonsuzdur, bu səbəbdən ən qısa zamanda Arayik Harutyunyan, Ruben Vardanyan kimi Sarkisyan, Koçaryan, Ter-Petrosyan da Bakıya gətirilib məhkəmə qarşısına çıxarılacaq.
Dünən erməni generalı Minasyanın görüntüləri yayılmışdı. İndi mən səbirsizliklə gözləyirəm ki, bizim müvafiq qurumlar Gürcüstanın xüsusi xidmət orqanları ilə əlaqə yaradıb, onun yerini müəyyən edib, onu Azərbaycana gətirsinlər. Qatilə, hərbi cinayətkara, caniyə söz nə ola bilər? Allahdan arzum odur ki, dövlətimizin gücü ilə onları da gətirək Azərbaycana mühakimə edək, cəzalarına verək. Əgər dünyada haqq-ədalət varsa, deyilən beynəlxalq məhkəmələr ədalətlidirsə, onları tapıb həbs edib məhkəmə qarşısına çıxarmalıdırlar, amma edirlərmi ?- Etmirlər? Buna görə də lazımı cavabı da, mühakiməni də özümüz edəcəyik. Onda görəcəklər ki, biz öz yerimizdə - vətənimizdə, Xocalıdayıq, onlar da öz yerində - Bakı təcridxanalarında qalacaqlar.
Qeyd edək ki, müsahibənin tam versiyası sabah - Xocalı soyqırımının 33-cü ildönümü günündə dərc ediləcək.
