15 İyun - Milli Qurtuluş Günü ilə bağlı tədbir keçirilmişdir. 12.06.2026
Laçın Rayon İcra Hakimiyyətinin başçısı Aqil Nəzərlinin, rayonun idarə, müəssisə və təşkilatlarının əmək kollektivlərinin və çoxsaylı rayon ictimaiyyəti nümayəndələrinin iştirakı ilə keçirilən tədbirdə əvvəlcə Ümummilli Lider Heydər Əliyevin Laçın Rayon İcra Hakimiyyətinin inzibati binası qarşısındakı büstü ziyarət olunaraq önünə gül dəstələri qoyulmuş, Ulu Öndərə tükənməz sevgi və ehtiram bildirilmişdir.
Ulu Öndər Heydər Əliyevin 15 iyun 1993-cü ildə Azərbaycan Respublikası Ali Sovetinə sədr seçilməsi müasir Azərbaycan Dövlətinin tarixində yeni bir səhifənin başlanğıcı oldu. Dərin hərc-mərclik və olduqca mürəkkəb ictimai-siyasi vəziyyətin hökm sürdüyü ölkəmiz məhz Heydər Əliyevin zəngin dövlətçilik təcrübəsi və siyasi iradəsi sayəsində nicat yoluna qədəm qoydu. Ümkummilli Lider Heydər Əliyev Azərbaycanı vətəndaş müharibəsindən, siyasi qarşıdurmalardan və tənəzzüldən xilas edərək, xalqımızı dirçəliş və əmin-amanlıq yoluna çıxardı. Heç kəsə sirr deyil ki, o dövrdə Azərbaycanda özbaşınalıq, xaos, iqtisadi, siyasi və digər sahələrdə ağır böhran hökm sürürdü. Erməni təcavüzünün də gücləndiyi bir vaxtda xalqımızın daha da dərinləşən sosial durumu getdikcə dözülməz nəticələrə səbəb olurdu. Belə çətin və əzablı bir zamanda Xalqı öz arxasınca aparmağa qadir olan yeganə şəxsiyyət Ulu Öndər Heydər Əliyev idi. O ağır günlərdə xalqın səsinə səs verən Ulu Öndər Heydər Əliyevin Naxçıvandan Bakıya gəlişi insanların qəlbində böyük inam yaratdı, dövlətçilik və müstəqillik arzularını yenidən alovlandırdı. Xalqımızın təkidli tələbi ilə hakimiyyətə qayıdan Heydər Əliyev 1993-cü il iyun ayının 15-də Azərbaycan Ali Sovetinin sədri seçildi. Bununla da, Azərbaycanda uzun müddət davam etmiş ictimai-siyasi gərginlik azaldı, ölkəmiz vətəndaş müharibəsindən və parçalanma təhlükəsindən azad oldu.
Ümumilli Liderin hakimiyyətə gəlməsi ölkədə bütün sahələrdə əsaslı dönüş yaratdı və Azərbaycanda beynəlxalq norma və prinsiplərə uyğun azad və demokratik dövlət quruculuğu prosesi başladı. Heydər Əliyevin gərgin əməyi sayəsində Azərbaycanın ərazi bütövlüyü və milli mənafelərini qorumağa qadir olan peşəkar və nizami ordu formalaşdırılımağa başlanıldı, digər tərəfdən Ermənistanla atəşkəsə nail olmaq üçün siyasi və diplomatik yollarla 1994-cü ilin may ayında olduqca vacib əhəmiyyətə malik atəşkəs elan olundu.
Ulu Öndər Heydər Əliyevin Azərbaycan Ali Sovetinin sədri seçildiyi gün - 15 İyun - Qurtuluş Günü Azərbaycan Milli Məclisinin qərarı ilə 1997-ci ilin 27 iyununda rəsmiləşdirildi. Milli Məclisin həmin tarixi qərarında deyilir: "Azərbaycan xalqının azadlığının, müstəqil dövlətçiliyinin müqəddəratının həll edildiyi ən ağır günlərdə Heydər Əliyevin öz xalqının iradəsinə tabe olaraq ölkə rəhbərliyinə qayıtması, əslində, onun müstəqil Azərbaycan Respublikasını, Azərbaycan xalqını, milli azadlıq hərəkatında qazanılmış tarixi nailiyyətləri məhv olmaqdan xilas etmək kimi çox çətin və şərəfli bir missiyanı könüllü olaraq öz üzərinə götürməsi idi. Bu, sözün əsl mənasında, "ömrümün qalan hissəsini də xalqıma qurban verirəm" deyib meydana atılan böyük ürəkli Vətən oğlunun öz xalqı, öz Vətəni qarşısında misilsiz fədakarlığı idi".
Hər il 15 İyun tarixi ölkəmizdə böyük qürur, fərəh və sevinclə qeyd olunur. Bu gün azad, bütöv, qüdrətli Azərbaycan dövləti məhz Ümummilli Lider Heydər Əliyevin şah əsəridir. Ulu Öndərin şərəfli yolunu ləyaqtlə və fəxrlə davam etdirən, Azərbaycan Respublikasının Prezidenti, Ali Baş Komandan İlham Əliyevin öz vəzifəsini yüksək peşəkarlıq və şərəflə yerinə yetirməsi sayəsində Vətən müharibəsində əldə etdiyimiz tarixi Zəfər məhz Ulu Öndər Heydər Əliyevin imzası olan Milli Qurtuluşun təntənəsidir.
