12 noyabr 2025-ci il tarixdə 44 günlük Vətən müharibəsi iştirakçısı, şəhid Cabbarov Elnur Şahmurad oğlunun anım günü ilə əlaqədar şəhidin məzarı ziyarət edilmişdir.
Tədbir Laçın Rayonu İcra Hakimiyyəti Aparatının, Laçın Rayonu İcra Hakimiyyəti başçısının Qarakeçdi kənd inzibati ərazi dairəsi üzrə nümayəndəliyinin, Rayonun digər idarə və müəssisə əməkdaşlarının, müharibə iştirakçılarının, şəhidin ailə üzvlərinin və yaxınlarının iştirakı ilə həyata keçirilmişdir.
Tədbirdə torpaqlarımızın azadlığı uğrunda canlarından keçən digər şəhidlərin də məzarları ziyarət edilmişdir.
27 sentyabr 2020-ci il tarixdə Azərbaycan ordusunun əks hücum əməliyatına başlayan zaman Cabbarov Elnur Şahmurad oğlu torpaqlarımızın azad olunması uğrunda gedən döyüşlərə qatılmış, Cəbrayıl, Füzuli, Xocavənd, Zəngilan və Şuşa rayonlarının işğaldan azad edilməsi uğrunda gedən döyüşlərdə iştirak etmişdir. 5 noyabr 2020-ci il tarixdə Şuşa istiqamətində gedən döyüşlərdə ağır yaralanmış, 12 noyabr 2020-ci ildə şəhid olmuşdur. Ağcabədi rayonunun Taxta Körpü ərazisindəki Qarakeçdi obasında Qarakeçdi kənd qəbiristanlığında dəfn olunmuşdur.
Azərbaycan Respublikası Prezidentinin Sərəncamlarına əsasən ölümündən sonra "Qarabağ" ordeni, “Vətən uğrunda” medalı, “Cəbrayılın azad olunmasına görə” medalı, “Füzulinin azad olunmasına görə” medalı və “Xocavəndin azad olunmasına görə” medalı ilə təltif olunmuşdur. Ailəli idi,1 qız övladı yadigar qalıb.