2025-ci il 8 noyabr - Zəfər Gününün beşinci ildönümünün qeyd edilməsi ilə bağlı Laçın Rayonu İcra Hakimiyyəti başçısının şəhər, qəsəbə və kənd inzibati ərazi dairələri üzrə nümayəndəliklərinin fəaliyyətinə dair müəyyən edilmiş “TƏDBİRLƏR PLAN”ına müvafiq olaraq 02 noyabr 2025- ci tarixdə 552 ailəlik Taxta Körpü məcburi köçkün qəsəbəsində Laçın Rayonu İcra Hakimiyyəti başçısının Qarakeçdi kənd inzibati ərazi dairəsi üzrə nümayəndəliyinin və Laçın rayon M.Məmmədov adına 2 nömrəli tam orta ümumitəhsil məktəbinin əməkdaşlarının iştirakı ilə 44 günlük Vətən müharibəsi iştirakçısı, şəhid Cabbarov Elnur Şahmurad oğlunun valideyinləri ilə görüş keçirilmişdir.
Görüş zamanı qəhrəman döyüşçünün valideyinləri Cabbarov Şahmurad Cabbar oğluna və Cabbarova Səadət Baladə qızına Laçın Rayonu İcra Hakimiyyəti başçısının salamları çatdırılmış, Dövlətimizin diqqət və qayğısının daim onların üzərində olması nəzərlərinə çatdırılmışdır.
Qəhrəman döyüşçümüzün keçdiyi şərəfli döyüş yolu barədə və digər xatirələr bir daha yad edilmişdir.
Qeyd edək ki, igid döyüşçü olmuş, Laçın rayonunun Qarakeçdi kənd sakini şəhid Cabbarov Elnur Şahmurad oğlu 15 sentyabr 1994-cü ildə Laçın rayonunun Qarakeçdi kəndində anadan olmuşdur. 1 sentyabr 2001-cı ildə Laçın rayon Taxtakörpü qəsəbə tam orta məktəbinin 1-ci sinifinə daxil olmuş, 2012-ci ildə həmin məktəbin 11-ci sinifini bitirmişdir. Cabbarov Elnur Şahmurad oğlu 2013-cü ilin oktyabr ayında həqiqi hərbi xidmətə yollanmış, 2015-ci ilin aprel ayında həqiqi hərbi xidmətdən təxris olunmuşdur. 17 iyun 2020-ci ildən Azərbaycan ordusunda müddətdən artıq hərbi qulluqçu kimi xidmətə başlamışdır.
27 sentyabr 2020-ci il tarixdə Azərbaycan ordusunun əks hücum əməliyatına başlayan zaman Cabbarov Elnur Şahmurad oğlu torpaqlarımızın azad olunması uğrunda gedən döyüşlərə qatılmış, Cəbrayıl, Füzuli, Xocavənd, Zəngilan və Şuşa rayonlarının işğaldan azad edilməsi uğrunda gedən döyüşlərdə iştirak etmişdir. 5 noyabr 2020-ci il tarixdə Şuşa istiqamətində gedən döyüşlərdə ağır yaralanmış, 12 noyabr 2020-ci ildə şəhid olmuşdur. Ağcabədi rayonunun Taxta Körpü ərazisindəki Qarakeçdi obasında Qarakeçdi kənd qəbiristanlığında dəfn olunmuşdur.
Azərbaycan Respublikası Prezidentinin Sərəncamlarına əsasən ölümündən sonra "Qarabağ" ordeni, “Vətən uğrunda” medalı, “Cəbrayılın azad olunmasına görə” medalı, “Füzulinin azad olunmasına görə” medalı və “Xocavəndin azad olunmasına görə” medalı ilə təltif olunmuşdur. Ailəli idi,1 qız övladı yadigar qalıb.