Laçın Rayon İcra Hakimiyyəti başçısının 2026-cı il 16 sentyabr tarixli 5-64/3-3-137/2026 nömrəli sərəncamı ilə təsdiq edilmiş “27 Sentyabr - Anım Günü ilə bağlı Laçın Rayon İcra Hakimiyyəti başçısı Aparatının Tədbirlər Planı”nın 5-ci bəndində Anım Günü ərəfəsində ağacəkmə aksiyalarının keçirilməsi qərara alınmışdır. Bu məqsədlə Ağcabədi rayonunun Taxta Körpü qəsəbəsi ərazisində Laçın Rayon İcra Hakimiyyətinin təşkilatçılığı ilə müqəddəs şəhidlərimzin əziz xatirəsinə həsr olunmuş ağacəkmə aksiyası keçirilmişdir.

Ağacəkmə aksiyasının keçirildiyi yerdə əvvəlcədən təmizlik və abadlıq işləri aparılmış, ağacların əkilməsi üçün yerlər hazırlanmışdır.

Ağacəkmə aksiyasında Laçın Rayon İcra Hakimiyyətinin başçısı Aqil Nəzərli, Laçın rayonunun hüquq-mühafizə orqanlarının rəhbərləri, şəhid ailə üzvləri, müharibə əlilləri və veteranları, rayon ictimaiyyətinin nümayəndələri iştirak etmişlər.

Ölkəmizin ərazi bütövlüyünün və suverenliyinin bərpası uğrunda canlarından keçmiş şəhidlərimzin əziz xatirəsinə ehtiram olaraq keçirilən ağacəkmə aksiyası çərçivəsində ərazidəki parkda həmişəyaşıl ağaclar əkilmiş, suvarma işləri aparılmışdır.

Aksiyanın əsas məqsədi şəhidlərimizin xatirəsini ehtiramla yad etməklə yanaşı, yaşıllıq sahələrinin genişləndirilməsi, ətraf mühitin qorunması və ərazinin ekoloji mühitinin daha da yaxşılaşdırılmasına töhfə vermək olmuşdur.