8 noyabr Zəfər Gününün beşinci ildöünümü ilə bağlı
şəhid ailəsi ilə görüş keçirilmişdir.

8 noyabr Zəfər Gününün beşinci ildöünümü ilə bağlı Laçın Rayon İcra Hakimiyyəti başçısının Qayğı qəsəbə inzibati ərazi dairəsi üzrə nümayəndəliyin və Laçın Rayon 4 saylı körpələr evi-uşaq bağçasının birgə təşkilatçılığı ilə Ağcabədi rayonunun Taxta Körpü ərazisindəki 21 ailəlik qəsəbədə müvəqqəti məskunlaşmış 44 günlük Vətən müharibəsinin şəhidi İlyas Şahvələdovun ailə üzvləri ilə görüş keçirilmişdir. Görüş zamanı şəhid İlyas Şahvələdovun keçdiyi döyüş yolundan, torpaqlarımızın işğaldan azad olunması uğrunda göstərdiyi qəhramanlıqlardan danışılaraq xatirəsi anılmışdır. Şəhid İlyas Şahvələdovun ailə üzvləri onlara dövlət tərəfindən göstərilən hərtərəfli diqqət və qayğıya görə Ölkə Prezidenti İlham Əliyevə öz təşəkkür və minnətdarlıqlarını bildirmişlər.
Laçın rayonunun Qorçu kənd sakini şəhid Şahvələdov İlyas Ehtibar oğlu 6 avqust 1996-cı ildə Bərdə rayonunda anadan olmuşdur. 1 sentyabr 2003-cü ildə Bərdə rayonu Qaratəpə kənd tam orta məktəbinin 1-ci sinifinə daxil olmuş, 2014-cü ildə həmin məktəbin 11-ci sinifini bitirmişdir. Şahvələdov İlyas Ehtibar oğlu 2014-cü ilin oktyabr ayında həqiqi hərbi xidmətə yola düşmüş, 2016-cı ilin “Aprel” döyüşlərində iştirak etmiş və döyüşlər başa çatdıqdan sonra hərbidən ehtiyata buraxılmışdır. 2020-ci ilin yanvar ayından Müddətdən artıq hərbi qulluqçu kimi ordu sıralarında xidmətə başlamışdır.
27 sentyabr 2020-ci il tarixdə Azərbaycan ordusunun əks hücum əməliyatına başlayan zaman Şahvələdov İlyas Ehtibar oğlu torpaqlarımızın azad olunması uğrunda gedən döyüşlərə qatılmış, Füzuli rayonunun işğaldan azad edilməsi uğrunda gedən döyüşlərdə iştirak etmişdir. 4 oktyabr 2020-ci ildə Füzuli rayonunun işğaldan azad edilməsi uğrunda gedən döyüşlərdə qəhrəmancasına şəhid olmuşdur. 10 oktyabr 2020-ci ildə Bərdə rayon Şəhidlər Xiyabanında dəfn edilmişdir.
Azərbaycan Respublikası Prezidentinin Sərəncamlarına əsasən ölümündən sonra “Vətən uğrunda” medalı və “Füzulinin azad olunmasına görə” medalı ilə təltif edilmişdir.