Şəhid Cabbarov Şahgündüz Habil oğlunun anım mərasimi keçirilib.
İşğal olunmuş torpaqlarımızın azad olunması və ərazi bütövlüyümüzün bərpası uğrunda gedən döyüşlərdə qəhrəmancasına şəhid olmuş Cabbarov Şahgündüz Habil oglunun anım mərasimi keçirilib.
Tədbirdə YAP Laçın rayon təşkilatının sədri İlqar İlyasov, Laçın Rayon İcra Hakimiyyəti Başçısının müavini Aynurə Həsənova, şəhidin ailə üzvüləri və ictimaiyyət nümayəndələri iştirak ediblər.
Tədbir iştirakçıları Xəzər rayonu Binə qəsəbəsində Şəhidlər Xiyabanda şəhidin məzarını ziyarət edib,məzarı üzərinə tər çiçəklər düzüblər.
Çıxış edənlər Qəhrəman Vətən oğlunun keçdiyi döyüş yolundan və şücaiətindən bəhs ediblər. Məktəblilər şəhidlərimizə, Qələbəmizə həsr olunmuş şerlər söyləyiblər.
Laçın rayonunun Oğuldərə kənd sakini şəhid Cabbarov Şahgündüz Habil oğlu 13 yanvar 1995-ci il tarixdə Bərdə rayonunda anadan olmuşdur. 2016-cı ilin iyul ayında həqiqi hərbi xidmətə yola düşmüş, 2017-ci ilin iyul ayında hərbi xidmətdən ehtiyata buraxılmışdır.
27 sentyabr 2020-ci il tarixdə Azərbaycan ordusunun əks hücum əməliyatına başlayan zaman Cabbarov Şahgündüz Habil oğlu könüllü olaraq torpaqlarımızın azad olunması uğrunda gedən döyüşlərə qatılmış, Cəbrayıl, Füzuli, Xocavənd və Qubadlı rayonlarının işğaldan azad edilməsi uğrunda gedən döyüşlərdə iştirak etmişdir. 25 oktyabr 2020-ci il tarixdə Füzuli rayonunun işğaldan azad edilməsi uğrunda gedən döyüşlərdə qəhrəmancasına şəhid olmuşdur. 26 oktyabr 2020-ci ildə Xəzər rayonu Binə qəsəbəsində şəhidlər qəbirsanlığında dəfn edilmişdir.
Azərbaycan Respublikası Prezidentinin Sərəncamlarına əsasən ölümündən sonra “Vətən uğrunda” medalı, “Füzulinin azad olunmasına görə” medalı, “Xocavəndin azad olunmasına görə” medalı, “Cəbrayılın azad olunmasına görə” medalı və “Cəsur Döyüşçü” medalı ilə təltif edilmişdir.