Mən Aynur İbrahimova artıq 8 ildir ki, hər gün Göyçaydan Ucarın Təzə Şilyan kəndinə 80 km məsafə qət edib Azərbaycan dili və ədəbiyyat fənnini tədris edirəm. "Oxumaq heç vaxt gec deyil" layihəsi mənim həyatımda bu günədək ən vacib qərarlarımdan , layihəmdən biri oldu. Hər zaman ən böyük arzum təhsil almaqdan məhrum olan xanımların təhsil almasına şərait yaratmaq, dəstək olmaq olub. Öncə uşaq evindəki uşaqlarla başladığım bu missiya indi şagirdlərimin ailələri ilə, təhsildən kənar qalmış analarla, nənə olmuş xanımlarla davam edəcək. Müəllim kimi fəaliyyət göstərdiyim kənddə bir zamanlar təhsil almaq istəyi olub, ancaq maddi imkansızlıqdan, valideyn müdaxiləsindən , erkən nigaha cəlb olunma və s. səbəbindən bu arzusu reallaşmayan bir çox xanımlar artıq ən böyük arzularını reallaşdıracaqlar. Onlar müxtəlif fənlər üzrə ödənişsiz təşkil olunan hazırlıqlara qoşulub arzusunda olduğu ali məktəb , kollec və texnikumlarda təhsil ala biləcəklər. Mən bir neçə həmkarıma könüllü olaraq bu layihıyə qoşulmağı və ödənişsiz şəkildı belə valideynləri hazırlamağı təklif etdim. Hazırda 3 fənn üzrə hazırlıqlar təşkil olunur. Valideynlərin seçdikləri ixtisas qruplara əsasən, avqust ayında digər fənn sayı artılacaq. Öncə ancaq işlədiyim kənddəki xanımları nəzərdə tutmuşdum. İstəyirdim kənddə savadsiz ana qalmasın. Bəzi şagirdlərim tək anası ilə yaşayırdı. Düşünürdüm ki, bu cür analar təhsil alsa, peşə sahibi olsalar, övladlarını tək başına böyütməkdə çətinlik çəkməyəcəklər.Bundan əlavə, həmişə təhsil almaq arzusu ilə yaşayan digər qadınlar da bu layihədən fatdalanarlar. Lakin bu təşəbbüs o qədər maraq doğurdu ki, işlədiyim rayonun hər yerindən müraciətlər oldu. Hətta digər rayonlardan da. İlk olaraq dərslərimizi əyani şəkildə İşlədiyim kənddə başladıq. Digər yerlərdən müraciət edən valideynlərlə dərslərimizi onlayn şəkildə qururuq.. Qeyd edim ki, təhsil almaq istəyən valideynlər sırasında nənələr, analar və nişanlı qızlarımız da var.

Dərslərimizə qoşulan analar sırasında yaşı ən çox 46 olan analar, bir ailədən olan gəlin-baldızlar, əsgər anaları, nəvə sahibləri, hətta Kürdəmirdən qayınatası gətirən, ailəsi dəstək olan, əyani dərslərə qoşulan xanımlar-valideynlər də var
Bu layihə ölkədə ilk təşəbbüsdü.
Məqsəd:
Artıq təhsildən nikaha gedən yox, ər evindən, ailədən təhsilə addım atan xanımların çox olması, savadlı olması, ailələrinə, övladlarına dəstək olmasıdır. Sağlam, güclü övlad ancaq özünə inanan, güclü və iradəli anaların sevgisiylə böyüyə bilər!
Böyük xeyriyyəçi Zeynalabdin Tağıyevin dediyi kimi "Bir kişi təhsil alırsa, bu yalnız bir savadlı insanın olması deməkdir. Amma bir qızın təhsil alması gələcəkdə həm savadlı qadın, həm də dünyagörüşlü bir ana deməkdir”
Bu xanımlara şərait yaradan atalara, həyat yoldaşlarına təşəkkür edirəm!
ISESKO-nun 2021-ci ili “Qadınlar ili” elan etməsini biz də əmələ çevirəcəyik.
Yay tətilini də həmin kəndə gedib hazırlığımızı davam edıcəyik.
Yaxın günlərdə ölkənin hər bölgəsindən valideynləri onlayn şəkildə dərslərə cəlb etməyi düşünürəm. Hər biri öz hesabimizadı. Kənardan maddi dəstəyimiz yoxdur. Dəstək olarsa, layihəni daha da böyüdərik.