Bugün Salyan rayonundan olan Şəhid Sabir Salahovun 24 yaşı qeyd olunub. Tədbirdə rayonun icra nümayəndələrilə birgə şəhid
valideynləri, qazilər, müharibə iştirakçıları və s. İştirak ediblər.

Sabir Salahov 1999-cu ildə Salyan şəhərində sadə bir ailədə dünyaya göz açıb. Atası şəhərdə taksi xidməti göstərməklə ailəni dolandırıb. Ailədə 2 qardaş olublar. Anası evdar qadındır. Sabirin uşaqlıqdan idmana xüsusi həvəsi olduğu üçün, şahmat və güləş hazırlıqlarına gedib. Şahmatı yaxşı bildiyi üçün və yarışlarda qalib olduğu üçün, stolüstü saat və at fiquru hədiyyə olunub.
Sabir Salahov 2016-cı ildə Salyan şəhərindəki 3 saylı orta məktəbi bitirdikdən sonra hərbi xidmətə yollanıb. O, hərbi xidmətini cəbhə xəttində yerləşən Ağcabədi rayonunun Qiyamadınlı kəndində yerləşən ən təhlükəli nöqtə olan “Qartal” postunda edib. Hərbi xidmətini başa vurduqdan sonra o 2019-cu ildə Azərbaycan Silahlı Qüvvələrində müddətdən artıq hərbi xidmətə başlayıb. Fizuli rayonunda, təmas xəttində xidmət keçib.
Hərbi əməliyyatlar başlayandan bir neçə gün sonra, oktyabrın əvvəllərində Salyanda xəbər yayılır ki, Sabir şəhid olub. Amma tezliklə bu xəbər yalan çıxır. Məlum olur ki, Sabir döyüşlərdən birində öz “buşlat”ını şəhid olmuş yoldaşı Səyyadın üstünə örtüb və döyüşü davam etdirib. Döyüş meydanından şəhidlərin meyitlərini yığanda Səyyadın üstünə örtülən “buşlatda” Sabirin ad-soyadını oxuyublar və onun şəhid olduğunu deyiblər.

Atası danışır ki, Sabir və döyüş dostları Fizuli rayonun Horadiz kəndinin işğaldan azad olunması uğrunda gedən şiddətli döyüşlərin qəhrəmanlarından biri idi. Horadizə Azərbaycan Bayrağını da onlar sancmışdılar. Oktyabr ayının 5-də Sabir Fizuli şəhərinin işğaldan azad edilməsi uğrunda gedən döyüşlərdə, Buqra dərəsi deyilən yerdə şəhid olub. Sabir Salahov oktyabr ayının 6-da Salyan şəhərində torpağa tapşırılıb.