YAP Laçın rayon təşkilatının sədri və fəalları əmək qəhrəmanı ilə görüşüb
YAP Laçın rayon təşkilatının sədri İlqar İlyasov bir qrup partiya fəalı ilə birlikdə Bərdə rayonu ərzisində müvəqqəti məskunlaşmış, Laçın rayon sakini əmək qəhrəmanı Şərqiyə Vəliyevanı ziyarət etmişlər. Sosialist Əməyi Qəhrəmanı Şərqiyə Vəliyeva səmərəli fəaliyyətinə görə müxtəlif illərdə keçmiş SSRİ-nin bir çox orden və medalları ilə təltif olunmuşdur. Şərqiyə Vəliyevanın əməyi müstəqillik illərində dövlət tərəfindən ən ali səviyyədə qiymətləndirilmiş - ona Azərbaycan Respublikası Prezidentinin Fərdi Təqaüdü təyin olunmuşdur.
Çay süfrəsi arxasında təşkil edilən görüşdə partiya və əmək veteranları ilə səmimi söhbət edilib. Onların həyat təcrübəsinə müasir gəncliyin daim ehtiyacı olduğu bildirilib, keçdikləri şərəfli ömür yolunun və zəhmətsevərliklərinin hər kəs üçün nümunə olduğunu qeyd edib. Doğma torpaqlarının işğaldan azad ediləcəyinə hər zaman inandığını bildirən Şərqiyyə xanım deyib: “Çox təəssüf ki, 1990-cı illərin əvvəllərində torpaqlarımız işğal olundu, doğma yurdumuzdan didərgin düşdük. Aradan illər keçsə də mən Laçının işğaldan azad ediləcəyinə əmin idim. İnanırdım ki, Prezidentimiz İlham Əliyev torpaqlarımızı azad edəcək. Artıq Laçın və digər rayonlarımız azaddır”.
Səmimi keçən görüşdə Şərqiyə Vəliyeva bu ziyarətin təşkilinə görə sevincini ifadə edib, işlədiyi illərlə bağlı öz xatirələrini bölüşərək, Vətənə, xalqa xidmətin ən şərəfli iş olduğunu vurğulayıb. Yaşının ixtiyar çağında ona dövlət qayğısının ilbəil artdığından razı qaldığını deyərək, göstərilən hərtərəfli diqqətə görə Prezident İlham Əliyevə öz minnətdarlığını bildirib.
DOVLETXEBERLERİ