Akademik C.M. Abdullayev adına Elmi-Tədqiqat Kardiologiya İnstitutunda qazilərə və xəstələrə qarşı hörmətsiz davranışlarla bağlı ciddi narazılıqlar səslənir.

Məlumatlara görə, institutda verilən yeməklərin keyfiyyəti qənaətbəxş deyil və gündəlik qidalanma şəraiti bərbad vəziyyətdədir.

Bu, xüsusilə uzun müddət müalicə alan xəstələr və qazilər üçün əlavə əziyyət yaradır.
Həmçinin, müəssisədə sanitariya şəraiti ilə bağlı problemlər diqqət çəkir. İddialara görə, kişi tualeti bağlıdır, yalnız qadın tualeti işləyir ki, bu da həm xəstələrin, həm də qazilərin rahatlığını ciddi şəkildə məhdudlaşdırır.
Şikayətçilər bildirirlər ki, bu hallar yalnız fiziki şəraiti deyil, həm də institutun rəhbərliyinin insanlara münasibətini əks etdirir. Qazilər və xəstələr institutda hörmətsizliklə qarşılaşdıqlarını və haqlarının təmin olunmadığını vurğulayırlar.

Qazilər, xüsusilə, dövlət tərəfindən təmin olunmalı hüquqlarının gözardı edilməsindən narazılıqlarını bildirir.
Hələlik, institut rəhbərliyindən bu iddialarla bağlı rəsmi açıqlama yoxdur. Lakin ictimaiyyətin diqqətini çəkən bu hallar, gələcəkdə məsuliyyətli addımların atılmasını tələb edir və qazilər ilə xəstələrin hüquqlarının qorunmasının vacibliyini bir daha gündəmə gətirir.