ANONS! Qaxın yollarının təmirinə ayrılan vəsaitlər hara xərclənir?
13 saylı Yol İstismar İdarəsinin rəisi Əhməd Mirzəbəyov rayonun yollarının istifadəyə yararsız hala düşməsinin səbəbkarıdır Azərbaycan Avtomobil Yolları Dövlət Agentliyinin Qax rayon 13 saylı Yol İstismar İdarəsinin rəisi Əhməd Mirzəbəyov ona tapşırılan işlərin öhdəsindən layiqincə gəlməyi bacarmır. Bu barədə redaksiyamıza verilən məlumatlarda bildirilir. Rayon sakinlərinin bildirdiyinə əsasən, idarə rəisinin öz mənafeyi üçün çalışması Qaxın əksər yollarının istifadəyə yararsız vəziyyətə düşməsi ilə nəticələnib.
Bu rayonda yolların vəziyyəti elə də ürək açan deyil. Bir çox yaşayış massivlərində məlumatverici lövhələr yoxdur, yol nişanlarının sayı isə kifayət qədər deyil. Yolların təmirinə hər il kifayət qədər vəsait ayrılır, amma əksər yollar istismara yararsız haldadır. Təmir məqsədilə ayrılan vəsaitlər göyə sovrulur. İdarənin balansındakı texnikaların bir çoxu istismar müddətini çoxdan başa vursa da, rəis həmin texnikalara ehtiyat hissələrinin alınması, həmçinin yanacaq adı altında külli miqdarda vəsait silir». Başqa bir məlumata əsasən isə 13 saylı Yol İstismar İdarəsində «ölü can»lar var və rəis tabeliyində olan işçilərin əmək hüquqlarını tapdalayaraq şəxsi maliyyə imkanlarını artırır. Bu barədə yaxın günlərdə ətraflı məlumat verəcəyik. Ümid edirik ki, Azərbaycan Avtomobil Yolları Dövlət Agentliyinin İdarə Heyətinin Sədri Saleh Məmmədov cənabları yazdığımız məsələləri araşdırıb lazım olan tədbirləri həyata keçirəcək. Qarşı tərəfin də münasibət bildirmək hüququ var.
