Qondarma “Dağlıq Qarabağ respublikasının dövlət naziri” vəzifəsində çalışmış Ruben Vardanyan həbs edilib. Rusiyalı milyarder Ruben Vardanyan sentyabrın 27-də “Laçın” sərhəd-buraxılış məntəqəsində Dövlət Sərhəd Xidmətinin (DSX) əməkdaşları tərəfindən saxlanılaraq Bakıya gətirilib. Saxlanılan şəxs barəsində müvafiq qərar qəbul edilməsi üçün aidiyyəti dövlət orqanlarına təhvil verilib.



1968-ci il təvəllüdlü erməni milyarder Ruben Vardanyan İrəvanda anadan olsa da, sərvətini Rusiyada qazanıb. "Forbes" jurnalı onun varidatının təxminən 1 milyard dollar həcmində qiymətləndirir. O, Birinci Qarabağ müharibəsində ermənilərin cinayətlərində birbaşa iştirak etməsə də, bir sıra əməllərinə görə hüquqi məsuliyyət daşıyır



Vardanyanı hansı cəzanın gözlədiyini araşdırıb.



Hüquqşünas Fərhad Mehdiyev saytımıza açıqlamasında bildirib ki, Ruben Vardanyanın Cinayət Məcəlləsinin 280, 281 maddəsi ilə, həmçinin sübut ediləcəyi halda 282 və 283-cü maddələri ilə ittiham edilməsi mümkündür.



Cinayət Məcəlləsinin 280-ci maddəsində Azərbaycan Respublikasının konstitusiya quruluşunu zorla dəyişdirmək və ya Azərbaycan Respublikasının ərazi bütövlüyünü parçalamaq məqsədilə silahlı qiyam təşkil etmə və ya qiyamda fəal iştirak etməyə görə 12 ildən 20 ilədək müddətə azadlıqdan məhrum etmə və ya ömürlük azadlıqdan məhrum etmə nəzərdə tutulur.



Məcəllənin 281-ci maddəsi isə dövlət əleyhinə yönələn açıq çağırışlara qarşı cəzaları nəzərdə tutur. Hakimiyyətin zorla ələ keçirilməsinə, zorla saxlanılmasına və ya Azərbaycan Respublikasının konstitusiya quruluşunun zorla dəyişdirilməsinə və ya ərazi bütövlüyünün parçalanmasına yönələn açıq çağırışlar etmə, habelə bu cür məzmunlu materialları yaymaya görə cinayətkar beş ilədək müddətə azadlıqdan məhrum etmə ilə cəzalandırılır. Nəzərdə tutulmuş əməllər xarici təşkilatların və onların nümayəndələrinin tapşırığı ilə törədildikdə isə cinayətkar yeddi ildən on iki ilədək müddətə azadlıqdan məhrum etmə ilə cəzalandırılır.



Məcəllənin 282-ci maddəsi Azərbaycan Respublikasının müdafiə qabiliyyətini və iqtisadi təhlükəsizliyini zəiflətmək məqsədilə müəssisələrin, qurğuların, yolların, əlaqə və rabitə vasitələrinin, əhalinin həyat təminatı obyektlərinin dağıdılmasına, yaxud zədələnməsinə yönəldilən partlayışlar, yanğınlar və sair hərəkətlər törətməni nəzərdə tutur. 284-cü maddədə isə milli, irqi, sosial və ya dini nifrət və düşmənçiliyin salınması ilə bağlıdır.



Qeyd edək ki, Vardanyanın cəzası ilkin istintaq tədbirlərindən sonra daha dəqiq məlum olacaq.