15 sentyabr tarixində ölkəmizin bütün bölgələrində olduğu kimi Laçın rayonunda da 2022-2023-ci tədris ilinin ilk dərs gününə start verildi.
Cari ilin sentyabrın 12-si gecə və 13-ü səhər saatlarında Ermənistan ordusu tərəfindən törədilən genişmiqsaylı təxribatın qarşısı alınarkən xeyli sayda hərbçimiz şəhid olması səbəbi ilə Elm və Təhsil Nazirliyinin tapşırığına əsasən respublikanın bütün ümumi təhsil müəssisələrində olduğu kimi rayonda da Bilik Günü ilə bağlı nəzərdə tutulan təntənəli tədbirləri ləğv edilmişdir.
Rayonun bütün ümumi təhsil müəssisələrində Azərbaycan Respublikasının Dövlət Himninin səsləndirilməsi ilə başlanan ilk dərs “Qarabağ Azərbaycandır!” mövzusuna həsr olunmuş, dövlətimizin ərazi bütövlüyü və torpaqlarımızın erməni işğalçılarından azad edilməsində qəhrəmancasına həlak olmuş bütün şəhidlərimizin əziz xatirəsi bir dəqiqəlik sükutla yad olunaraq onların ruhuna dualar oxunmuşdur.
Danılmaz həqiqətdir ki, son illərdə ölkəmizdə digər sahələrlə yanaşı təhsildə qazanılan bütün uğurlar ölkə başçısı cənab İlham Əliyevin təhsilin inkişafı ilə əlaqədar imzaladığı proqramlar çərçivəsində həyata keçirilən islahatlar, ölkənin birinci xanımı Mehriban Əliyevanın təhsil obyektlərinin yeniləşməsi sahəsində gördüyü işlərin və dövlətimizin bu sahəyə xüsusi qayğısının əməli nəticəsi olaraq ölkəmizdə yeni dərs ili ərəfəsində yeni məktəblər tikilib, bir çox təhsil müəssisələr əsaslı təmir olunub, bunun da nəticəsində təhsil ocaqlarının maddi-texniki bazası xeyli möhkəmlənmişdir. Ölkə Prezidenti cənab İlham Əliyevin müdrik siyasəti nəticəsində bu gün bütün respublikamızda olduğu kimi Laçın rayonunda da təhsilin səviyyəsi günü-gündən artmaqdadır. Bunun bariz nəticəsidir ki, ötən dərs ilinin yekunlarına görə rayonun ümumtəhsil müəssislərini bitirmiş məzunlardan 428 nəfər respublikanın ali təhsil müəssisələrinə qəbul olunmuşdur ki, onlardan da 18 –i 600-dən 28 nəfəri isə 500 –dən çox bal toplamışdır.
Qeyd edilir ki, 2022-2023-cü tədris ilində rayon üzrə fəaliyyət göstərəcək 82 tam orta və 22 ümumi orta məktəbində təhsil alacaq şagirdlərin ümumi sayı 13311 nəfərdir. Onlardan 1186 şagird I sinifdə, 1311 şagird IX sinifdə, 1031 şagird isə XI sinifdə təhsil alacaq, həmçinin yeni işə qəbul olunmuş 137 gənc müəllim pedaqoji fəaliyyətə başlayacaqdır.
