18.03.2024-cü il tarixdə Yeni Azərbaycan Partiyasının Laçın rayon təşkilatının sədri İlqar İlyasov 2 saylı ərazi partiya təşkilatının bir qrup YAP fəalları ilə görüş keçirmişdir.
Görüşdə 2 saylı ərazi partiya təşkilatının sədri, Şərqi Zəngəzur Regional Təhsil İdarəsinin Laçın rayon üzrə sektor müdiri Nicat Həsənov və YAP fəalları iştirak etmişdilər.
Görüşdə nitq söyləyən İlqar İlyasov tədbir iştirakçlarını 7 fevral 2024-cü ildə keçirilmiş növbədənkənar prezident seçkilərində əldə olunmuş mütləq qalibiyyət münasibəti ilə təbrik edərək bildirdi ki, 7 fevral - növbədənkənar prezident seçkiləri ölkənin bütün ərazisində baş tutan ilk seçki kimi də tarixə qızıl hərflərlə yazıldı. İlk dəfə olaraq bu seçkilər Azərbaycanın hər bir guşəsində, o cümlədən 30 illik işğaldan azad edilmiş torpaqlarımızda keçirildiyi üçün Azərbaycanın Zəfər seçkisi adlanır.
Yeni dövrdə qarşıda duran strateji vəzifələrdən danışan ilqar ilyasov qeyd etdi ki, bu gün Azərbaycan xalqı formalaşmış yeni reallıqlar mühitində inamla və qürurla öz inkişafının növbəti mərhələsinə qədəm qoymuşdur. Yeni dövrdə qarşıda duran strateji vəzifələrimiz müstəqilliyimizi, əldə olunmuş nailiyyətləri daha da möhkəmləndirmək, Azərbaycanı davamlı və dayanıqlı inkişaf edən ölkəyə çevirməkdir. İşğaldan azad edilmiş ərazilərdə irimiqyaslı bərpa və yenidənqurma işlərinin, Böyük Qayıdışın davam etdirilməsi, təhlükəsizliyin təmin olunması və müasir ordu quruculuğu, qabaqcıl elmə və yüksək texnologiyalara əsaslanan iqtisadiyyatın formalaşdırılması, cəmiyyətin rifahının yüksəldilməsi, dövlət idarəçiliyi sisteminin təkmilləşdirilməsi, müstəqil xarici siyasət sayəsində Azərbaycanın beynəlxalq mövqelərinin daha da gücləndirilməsi, cəmiyyət həyatında şəffaflığın və ictimai iştirakçılığın, həmçinin ölkədə mövcud siyasi dialoqun dərinləşdirilməsi, zəngin mədəni irsimizin, milli-mənəvi dəyərlərimizin qorunması və digər məsələlər həyata keçirilən siyasətin prioritet istiqamətləri olacaqdır.
Hər bir vətəndaşın innovativ, müasir təhsilə və elmə çıxışı üçün dövlət dəstəyinin artırılmasından danışan İlqar İlyasov Yeni Azərbaycan Partiyasının fəal üzvü kimi, partiya dəyərlərinin təbliğində və ictimai proseslərdə aktiv iştirak etdiyi üçün bir qrup təhsil işçilərinə fəxri fərman təqdim edib və qarşıdan gələn Novruz bayramı münasibəti ilə bütün tədbir iştirakçılarını təbrik edərək onlara cansağlığı və işlərinizdə uğurlar arzulayıb.
